Superliga 8-turi doirasidagi «Dinamo» - «Navbahor» (0:1) uchrashuvidan keyin namanganliklar bosh murabbiyi Samvel Babayan matbuot anjumanida qatnashib, jurnalistlar savollariga javob qaytardi.

- Bugungi o‘yin chempionatning murosasiz kurashlar ostida o‘tayotganini yana bir karra isbotladi. O‘yinda saviya jihatdan raqibdan ustun ekanimizni ko‘rsatganimizga qaramay, so‘nggi soniyalarga qadar ikki jamoa ham bosimda to‘p surib, durang qayd etilayotgan edi. Ammo baribir mahorat, ijrochilar darajasi o‘z so‘zini aytdi. Bundan juda ham baxtiyormiz. Yigitlarga katta rahmat. O‘ylaymanki, o‘yindan-o‘yinga o‘sishda davom etamiz. Chempionat yanada qizg‘in ko‘rinish oladi.

- «Navbahor» peshqadamga aylangan bo‘lsa-da, «Dinamo»ga qarshi qanchalik o‘yinini ko‘rsata oldi?
- Chin qalbdan aytishni istardim, hozir Samarqandda ekanligimdan baxtiyorman. Samarqand – futbol shahri, Superliga bu shaharga qaytganidan juda ham xursandman. Qaysi klubda ishlamay, Samarqandda to‘p surish hech bir jamoamga oson bo‘lmagan. Bu stadiondagi muhitdan istalgan tarkibdagi jamoa raqibga qarshi oxirigacha kurashadi. «Dinamo»ning hozirgi tarkibi ham bundan mustasno emas. Hozirgi Superligada hech kimda qandaydir ustunlik bor deb gapirish qiyin, har qanday jamoalar o‘zaro bahslarda qiynalishmoqda. Chempionat shunisi bilan ham qiziq.

«Dinamo» tarkibida jarangdor nomlar yo‘q, ammo o‘yinda murabbiyning imzosi ko‘rinib turibdi. Ayniqsa, «Dinamo»ning himoya chizig‘i bugun juda tartibli o‘yin namoyish etdi. Fikrimcha, bu mavsum hech bir jamoaga Samarqandda oson bo‘lmaydi. Bugun esa kuchli jamoa yutdi, bu – fakt.