Erling Xolandning "Manchester Siti" bilan shartnomasida tovon puli bo‘ladi.

Hujumchini 150 million yevroga sotib olish varianti uning ingliz klubi bilan ikki yillik kelishuvidan so‘ng faollashtirilishi mumkin, deb xabar bermoqda Get German Football News.

"Siti" norvegiyalik futbolchini "Borussiya"dan 75 millionga sotib oladi - bu summa uning Dortmund klubi bilan shartnomasida tovon puli sifatida ko‘rsatilgan.

Umuman olganda, 21 yoshli hujumchining transferi "shaharliklar"ga maoshi bilan birga salkam 250 million yevroga tushadi. Agentlar uchun komissiya - 50 million yevro.

Oldinroq Madridning “Real” klubi Rayolaning 150 million yevro tovon puli talab qilishi sababli Xolandni transfer qilishdan bosh tortgani haqida xabar berilgandi.

Ikki yarim mavsumda Xoland nemis klubi safida 88 uchrashuvda 85 ta gol urdi va 23 ta samarali uzatma berdi.