Turkiyada bo‘lib o‘tayotgan boks bo‘yicha ayollar o‘rtasidagi jahon chempionatida bugungi janglar boshlandi. O‘zbekistonliklar orasida Nozimaxon Bulturova (54 kg.) ikkinchi bo‘lib o‘z jangini o‘tkazdi. Unga Serbiya vakili Yelena Zekich raqiblik qildi.

Serbiyalik sportchi jangni faol boshladi va raund oxiriga qadar tajovuzkor uslub bilan harakat qildi. Natijada birinchi bo‘limni u o‘z foydasiga hal qildi.

Nozimaxon esa ikkinchi bo‘limdan boshlab vaziyatni tenglashtira boshladi hamda raqibga bir nechta aniq zarbalar berishga muvaffaq bo‘ldi. Ammo bu raund ham Yelena foydasiga hal bo‘ldi.

Bulturova so‘nggi raundda tavakkal qilib oldinga tashlandi. Chunki, faqat nokautgina unga g‘alabani taqdim etishi mumkin edi. Hakamlarning 3 nafar so‘nggi bo‘limda o‘z ovozlarini Bulturovaga berishdi, ammo yakunda g‘alaba baribir serbiyalik Zekichga nasib etdi.

Eslatib o‘tamiz, Nozimaxon Bulturovaning birinchi bosqichdagi raqibi — senegallik bokschi ringga chiqmagani sabab, vatandoshimiz avtomatik tarzda nimchorak finalga yo‘l olgandi.