Turkiyada bo‘lib o‘tayotgan boks bo‘yicha ayollar o‘rtasidagi jahon chempionatida bugungi dasturdan o‘rin olgan kechki janglar boshlandi. 50 kg. vazn toifasida musobaqaga yo‘l olgan Aziza Yoqubova armanistonlik Anush Grigoryanga qarshi ringga ko‘tarildi.

Birinchi bo‘lim tengma-teng zarbalar ostida kechgan bo‘lsa-da, hakamlarning barchasi ustunlikni arman sportchisiga berishdi.

Ikkinchi raundda esa Aziza tashabbusni o‘z tomoniga og‘dirdi va raqibni qiyin ahvolga solib qo‘ydi. Natijada so‘nggi bo‘lim oldidan hisob mutlaqo tenglashdi.

Yoqubova ushbu raqibni mag‘lub etish mumkinligini his qildi va uchinchi raundda ham aslo bo‘sh kelmadi. Natijada, u musobaqada ikkinchi jangida ham g‘alaba qozondi va chorak finalga yo‘l oldi — 4:1.