Latviya poytaxti Riga shahrida nufuzli marafon musobaqalaridan biri bo‘lib o‘tdi. 76 mamlakatdan tashrif buyurgan sportchilar orasida hamyurtimiz Marina Xmelevskaya kumush medalga sazovor bo‘ldi.

O‘zbekiston yengil atletika federasiyasining ma’lum qilishicha, bu mamlakatimiz tarixida ayollar marafonidagi ikkinchi yuqori natija sifatida qayd etildi. So‘nggi bor 1984 yil Litvada o‘tgan Sobiq Ittifoq miqyosidagi musobaqada Nadiya Usmanova 2:30:36 vaqt bilan o‘zbekistonlik marafonchi qizlar rekordini o‘rnatgan edi.

Marina Latviyadagi musobaqada 2:33:19 ichida marraga yetib kelgan. Qayd etish joiz, hamyurtimiz poyga davomida mazkur yo‘nalishda yetakchi hisoblanuvchi Afrika, Amerika, shuningdek, yevropalik raqibalarini ortda qoldirishga muvaffaq bo‘ldi. Atletimiz faqatgina efiopiyalik sportchidan pastroq natija ko‘rsatdi.

“Rimi Riga Marathon-2022”, ayollar:
1. Mekuriya Zennebe (Efiopiya) – 2:30:53
2. Marina Xmelevskaya (O‘zbekiston) – 2:33:19
3. Aynelem Kasaxun (Efiopiya) – 2:38:21