O‘zbekiston 2023 yilda yana bir nufuzli musobaqa — 20 yoshgacha bo‘lgan futbolchilar o‘rtasidagi Osiyo chempionatiga mezbonlik qiladi. Turnirning final bosqichi yo‘llanmasi uchun saralash bahslari sentyabr oyida o‘tkaziladi. Saralash bosqichiga qur’a tashlash marosimi 24 may kuni OFK qarorgohi joylashgan Kuala Lumpur shahrida o‘ktaziladi. OFK qur’a oldidan jamoalarni savatlarga ajratib chiqdi.

O‘zbekiston eng oxirgi — 5-savatchaga joylashtirildi. Boisi, yoshlar terma jamoamiz 2018 yilgi Osiyo chempionatining final bosqichiga chiqa olmagandi. Jamoamiz Tojikistonda o‘tkazilgan saralash bosqichidan o‘ta olmagandi. Shu bois, bu safar so‘nggi savatchadan o‘rin oldik.

Darvoqe, ushbu yoshdagi terma jamoalari o‘rtasida 2020 yilgi musobaqa O‘zbekistonda o‘tkazilishi kerak edi. Ammo koronavirus pandemiyasi tufayli musobaqalar bekor qilindi.

O‘zbekiston bu galgi saralash bosqichi natijasidan qat’i nazar mezbon sifatida qit’a chempionatining final bosqichida ishtirok etadi. Saralash bosqichi bu safar Sharq va G‘arb mintaqalariga ajratilmaydi. Saralash bosqichida mezbonlik qiladigan 10ta mamlakatning nomi aniq. Ular o‘zaro bir savatchadan o‘rin olishmaydi.

10ta guruh g‘olibi va 2-o‘rinni egallagan jamoalar orasida 5ta eng yaxshi natijaga ega bo‘lgan jamoa yurtimiz maydonlarida o‘tadigan turnirga tashrif buyuradi. Osiyo chempionatida yuqori 4ta o‘rinni egallagan jamoalar 2023 yilning kuz faslida Indoneziyada o‘tkaziladigan Jahon chempionatida ishtirok etish huquqini qo‘lga kiritadi.

20 yoshgacha bo‘lgan futbolchilar o‘rtasidagi Osiyo chempionatiga saralash bosqichi qur’asi uchun savatchalar

1-savatcha: Saudiya Arabistoni (mezbon), Tojikiston (M), Indoneziya (M), Iordaniya (M), Tailand, Yaponiya, Avstraliya, Janubiy Koreya, Birlashgan Arab Amirliklari, Qatar

2-savatcha: Iroq (M), Ummon (M), Bahrayn (M), Xitoy, Vyetnam, Xitoy Taypeyi, Malayziya, Suriya, Eron, Yaman

3-savatcha: Qirg‘iziston, Mo‘g‘uliston, Bangladesh, Falastin, Hindiston, Myanmar, Livan, Makao, Gonkong, Filippin

4-savatcha: Laos (M), Turkmaniston, Singapur, Sharqiy Timor, Maldiv, Bruney, Shri Lanka, Nepal

5-savatcha: Afg‘oniston, Guam, Kuvayt, Shimoliy Mariana, O‘zbekiston, Butan