"Inter" "Chelsi"ga hujumchi Romelu Lukakuni ikki yillik ijaraga berish bo‘yicha taklif yuborishni rejalashtirmoqda, deya xabar beradi jurnalist Janluka Di Marsio.
Manba bergan xabarga ko‘ra, 29 yoshli belgiyalik London klubi rahbariyatidan "Inter" taklifini qabul qilishni so‘ramoqchi.
Qayd etilishicha, 2021 yil oxiridan buyon hujumchi Milan klubi murabbiylar shtabi va rahbariyati bilan doimiy aloqada bo‘lib kelgan.
Shu bilan birga, Lukaku Italiyaga qaytish uchun hozirgi maoshining uchdan biridan voz kechishga tayyor.
Eslatib o‘tamiz, belgiyalik futbolchi 2021 yilning 12 avgustida 97,5 million funt evaziga "Chelsi"ga o‘tgan edi.
O‘tgan mavsumda Lukaku londonliklar safida barcha musobaqalarda 44 o‘yinda 15 ta gol urdi va 2 ta golga assistentlik qildi. Hujumchining klub bilan shartnomasi 2026 yilning 30 iyuniga qadar amal qiladi.
