"Napoli" klubi hujumchi Dris Mertensning yiliga 4 million yevro maosh talabini rad etdi, deb xabar beradi La Gazette Dello Sport.
Manba bergan xabarga ko‘ra, 35 yoshli belgiyalik futbolchining vakillari uning xizmatlarini bir qancha klublarga, jumladan, "Roma"ga ham taklif qilishgan.
Qayd etilishicha, Rim klubiga o‘tish uchun hujumchi maosh talabini 3,5 million yevrogacha kamaytirishi kerak.
Shu bilan birga, "Roma" rahbariyati Mertensning yoshi va iqtisodiy sharoitini hisobga olgan holda uning transferi variantini ko‘rib chiqadi.
Mertens o‘tgan mavsumda “Napoli” safida barcha turnirlar doirasida 37 ta o‘yinda maydonga tushib, 13 ta gol urdi va 2 ta golli uzatmani amalga oshirdi. Hujumchining neapolliklar klubi bilan shartnomasi 2022 yilning 30 iyuniga qadar amal qiladi.