«Real» klubi «Manchester Siti»ning braziliyalik hujumchisi Gabriel Jezusni qo‘lga kiritishga jiddiy bel bog‘lagan. Ammo "Qirollik klubi" bunda boshqa muammoga duch keladi.

La liga reglamentiga ko‘ra, bir jamoa Yevropa ittifoqi a’zosi bo‘lmagan mamlakatlardan 3 nafar legionerni ro‘yxatdan o‘tkazish huquqiga ega. Hozirda madridliklar safida bu limitni Vinisius, Eder Militao va Rodrigo to‘ldirishgan. «Real» mazkur yozda ulardan birortasi bilan xayrlashishni rejalashtirmayapti. Shuning uchun jamoa Vinisiusga imkon qadar tezroq Ispaniya fuqaroligini olib borish ustida bosh qotirmoqda.

Ma’lumotlarga qaraganda, braziliyalik futbolchi 2020 yilda ispan pasportini olish uchun hujjat topshirgan. Ammo koronavirus muammosi tufayli ushbu masalasi shu paytgacha hal bo‘lmay kelyapti. Hozirda 300 ming kishi Ispaniya fuqaroligini olish uchun navbat kutib turibdi. Ularning hujjatlarini atigi 30 nafar xodim ko‘rib chiqadi. Ular bir yilda eng ko‘pi bilan 60 ming kishiga pasport berishi mumkin.

Shu bois, "Real" legionerlarga o‘rnatilgan limit masalasini hal qilmasdan turib Jezusning transferiga qo‘l urmaydi.