Osiyo kubogi-2023 saralash bosqichidan o‘rin olgan Tailand — Shri Lanka (2:0) uchrashuvidan so‘ng har ikkala jamoa bosh murabbiylari matbuot anjumanida ishtirok etishdi.

Shri Lanka terma jamoasi bosh murabbiyi Muhammad Hassan:

"Bizga ozgina o‘yin amaliyoti yetishmayapti. Lekin har gal o‘sishga erishishga harakat qilyapmiz. O‘zbekiston va Tailandni o‘yinini solishtiradigan bo‘lsam, O‘zbekistonda temp yuqoriroq va ular agressivroq o‘ynashadi. Har doim to‘pni olishi bilan hujumga intiladigan jamoa.

Keyingi o‘yin biz uchun juda muhim o‘yin bo‘ladi. Maldivga qarshi bizda revansh kayfiyati bo‘ladi. Oldingi safar yutqazgan edik, bu gal yaxshi natija qayd etishga harakat qilamiz".

Tailand terma jamoasi bosh murabbiyi Aleshandre Pyolking:

"Doim himoyalanayotgan jamoaga qarshi o‘ynash juda ham qiyin. Raqibimiz deyarli hujumga borgani ham yo‘q. Faqat gol o‘tkazib yubormaslik haqida o‘yladi. Shu sababli biz ham biroz qiynaldik.

Lekin guruhda chiqish vazifasini uddaladik, deb o‘ylayman. Chunki 6 ochko bizga yetarli bo‘lishi kerak. Keyingi uchrashuv esa O‘zbekistonga qarshi katta test bo‘ladi biz uchun.

O‘zbekiston kuchli raqib va men bu jamoaga qarshi maksimal, to‘liq asosiy tarkibda o‘ynab, natijaga intilishga harakat qilaman. O‘zbekistonda qarshi o‘yinda ham biz hujumkor uslubimizdan voz kechmaymiz".