Xabaringiz bor, shanba tongida boks bo‘yicha Olimpiada o‘yinlari g‘olibi, Osiyo va jahon chempioni, endilikda professional boksda ham muvaffaqiyatli odimlayotgan hamyurtimiz Bahodir Jalolov AQSHda o‘zining navbatdagi reyting jangini o‘tkazdi. 8 raundlik jangda u belgiyalik Jek Mulovayiga qarshi ringga ko‘tarildi va raqibini so‘nggi raundda nokautga uchratdi. Bu Bahodirning prof boksdagi 11-jangida qozonilgan 11-g‘alabasi sifatida tarixga kirdi. E’tiborlisi, Jalolov barcha janglarni muddatidan avval nokaut bilan yakunlamoqda.

Bugun yarim tunda yengilmas bokschimiz Bahodir Jalolov Nyu-Yorkdan qaytib keldi. Uni Islom Karimov nomidagi Toshkent xalqaro aeroportida Sportni rivojlantirish vaziri o‘rinbosari Shaxrullo Mahmudov, Milliy Olimpiya qo‘mitasi Bosh kotibi Oybek Kasimov, O‘zbekiston boks va professional boks federasiyalarining mas’ul rahbarlari, sportchining yaqinlari, ommaviy axborot vositalari xodimlari hamda blogerlar tantanali ravishda kutib olishdi.

Kutib olish marosimida OAV xodimlariga intervyu berar ekan, Bahodir Jalolov mana shunday g‘alabalar orqali o‘z reytingini oshirib borishi va tez orada og‘ir vazn toifasida chempionlik kamari uchun ringga ko‘tarilishdan umidvor ekanligini ta’kidladi.

Sportni rivojlantirish vazirligi yana bir bora Jalolovni qo‘lga kiritilgan ajoyib g‘alabasi bilan muborakbod etadi.