"Manchester Yunayted" hujumchisi Krishtianu Ronaldu faoliyatini "Bavariya"da davom ettirishi mumkinligi haqidagi xabar bejiz tarqalmagan ekan. Boisi, futbol agenti Jorje Mendesh 37 yoshli futbolchini myunxenliklarga taklif qilgan ekan. Mazkur kutilmagan taklif «Bavariya» rahbariyatini shokka tushirib qo‘ydi. Bu haqda jurnalist Peru Sepulveda xabar tarqatdi.

«Krishtianu Ronaldu o‘z jamoasining keyingi mavsumda Chempionlar ligasida ishtirok etmasligidan norozi. Portugaliyalik futbolchi ushbu musobaqasiz yashay olmaydi. Shuning uchun "MYU"ning unda qatnashmasligini hazm qila olmayapti. U o‘z agenti Jorje Mendesh bilan boshqa jamoa topish masalasida gaplashdi.

Angliyaning boshqa jamoalari haqida gap-so‘z bo‘lishi mumkin emas. U Angliyaning boshqa klubida o‘ynamasligi aniq. Shuningdek, u «PSJ»ning yangi loyihasiga mos tushmaydi. Faqat «Bavariya» varianti qolmoqda. Mendeshning taklifi esa «Bavariya»ni hayron qoldirdi. Chunki, myunxenliklar boshqacha tipdagi futbolchi qidirishmoqda.

Agent senga Ronalduni taklif qilayotganida uning yoshiga emas, maydondagi harakatlariga qarash kerak. Uning yillik maoshi 25 mln funt. Buni esa uncha-muncha klub ko‘tara olmaydi. Mendesh ushbu masalada «Bavariya» rahbariyatining fikrini so‘radi», – deya yozdi jurnalist Peru Sepulveda.