«Barselona» braziliyalik yarim himoyachi Rafinya bilan shartnoma imzoladi. Fabrisio Romano xabar tarqatishicha, «Lids» ushbu transfer uchun 58 mln yevro oladi. Shuningdek, yana 10 mln yevro bonuslar nazarda tutiladi.
Rafinyaning o‘zi esa kecha ijtimoiy tarmoqlarda faol bo‘ldi va «Barsa»ga o‘tishi bilan bog‘liq bir nechta suratlarda Instagramga qo‘ydi. Ular orasida quyidagi surat ham bor edi:
Bu sizga qaysidir suratni eslatmayaptimi, mabodo?
Ha, bu o‘sha Kilian Mbappening yoshlik chog‘ida tushgan surati: fransiyalik futbolchi Krishtianu Ronaldu va «Real»ning ashaddiy muxlisi bo‘lgan paytlar.
Mbappedan farqli o‘laroq Rafinya o‘z orzusini amalga oshirdi va "Barselona" safiga o‘tdi.
«Bu jamoada o‘ynash — men uchun katta sharaf. Ushbu jamoa futbolkasini kiyish baxtiga muyassar bo‘lganimdan minnatdorman. Men ko‘pgina kumirlarim "Barselona"da o‘ynagan va klub tarixidan o‘rin olishgan. Hech bo‘lmasa ular erishgan yutuqlarning yarmini qo‘lga kiritsam ham men uchun jiddiy yutuq bo‘ladi. Bolalikdagi orzum amalga oshdi. "Barsa" yana o‘z taxtiga qaytishi uchun qo‘limdan kelgan barcha ishni qilaman», – dedi braziliyalik futbolchi taqdimot marosimida.
