Superliganing 16-turidan o‘rin olgan “Lokomotiv” – “Bunyodkor” (0:0) uchrashuvidan keyin “qaldirg‘ochlar” ustozi Viktor Karpenko o‘z fikrlari bilan o‘rtoqlashdi.
- O‘yin haqida nima deyish mumkin? Deyarli bir bo‘limdan oshiqroq vaqt mobaynida 10 kishi bo‘lib harakat qilish oson emas. Yigitlarga qoyil! Xarakter ko‘rsatishdi. Hatto bir kishi kam bo‘lib qolganimizda ham maydonda mezbonlardan yaxshiroq ko‘rindik. Xavfli vaziyatlar yuzaga keltira oldik. Golimiz inobatga olinmadi. Futbolchilarimda g‘alabaga bo‘lgan ishtiyoq yuqori edi. Bu o‘yin uchun ularga minnatdorlik bildiraman! Muxlislarga ham rahmat aytaman! Yaxshi o‘ynab natijaga erisha olmaslik albatta alam qiladi.
Ikkinchi davraning ilk o‘yinida gol ura olmadik. Keyin “Qizilqum”ga gol urdik, ammo raqibdan ochko olish tortib olish nasib qilmadi. Bugun gol ura oldik, biroq hisobga olinmadi. Lekin o‘z hisobimizga bir ochko yozib qo‘ydik. Umid qilamanki, “Lokomotiv”ga qarshi kubok uchrashuvida g‘alaba qozonamiz.
Kubok o‘yini doim qiziqarli kechgan. Chunki bir uchrashuvdan iborat bu kabi o‘yinlarda qaysidir tomon g‘alaba qozonishi shart. Raqibimiz “Lokomotiv”. Yigitlar bugun bu raqibga qarshi o‘ynab ko‘rishdi. O‘ylaymanki, biz jangga tayyormiz!
