BAAning Abu-Dabi shahrida shaxmat bo‘yicha “28th Abu Dabi International Chess Festival” xalqaro turniri o‘z yakuniga yetdi.
Musobaqada 31 mamlakatdan kelgan 148 nafar shaxmatchi g‘oliblik uchun bahs olib borishdi. Ular orasida FIDE tasnifida yuqori o‘rinlarni egallab turgan xitoylik Vang Xao (2735 reyting ochkosiga ega), rossiyalik Yevgeniy Tomashevskiy (2702), Hindiston vakili Arjun Erigaisi (2689) kabi ancha nomdor grossmeysterlar ham bor edi.
Xalqaro turnirda qatnashgan iste’dodli shaxmatchimiz Javohir Sindorov 9 imkoniyatdan 7 ochko jamg‘ardi va yakunda 2-o‘rinni egalladi. 1-o‘rinni esa 7,5 ochko jamg‘argan hindistonlik Arjun Erigaisi egalladi. Kuchli uchlikka Niderlandiya vakili Jorden Van Forest yakun yasab berdi.
Shuningdek, Abu-Dabi turnirida yana bir nechta shaxmatchimiz o‘z imkoniyatlarini sinovdan o‘tkazishdi. Unga ko‘ra, Nodirbek Yoqubboyev 6,5 ochko bilan 5-o‘rindan joy olgan bo‘lsa, 6 ochko jamg‘argan Shamsiddin Vohidov 20-pog‘onani band etdi. 5,5 ochko to‘plagan Nilufar Yoqubboyeva 40-pog‘onani egalladi.
