Futzal bo‘yicha O‘zbekiston chempionatining yangi mavsumi Superkubok bahsi bilan boshlandi. Bugun "Jizzax-Kenteks" va AGMK jamoalari o‘rtasidagi mazkur sovrin uchun bahs bo‘lib o‘tdi.

O‘yin davomida klublar hisobda quvlashmachoq o‘ynashdi. Birinchi bo‘lim 3:3 hisobi bilan yakunlandi. Ikkinchi bo‘limda esa jizzaxliklar oldinga o‘tib olishdi. Olmaliqliklar esa ketma-ket 3ta gol urib, hisobni 6:4 ko‘rinishga keltirib qo‘yishdi. O‘yin tugashiga 5 daqiqa qolganida Bahodir Ahmedov o‘ynovchi darvozabon taktikasidan foydalanib, farqni bittaga qisqartirdi — 6:5. Ammo qolgan daqiqalarda ushbu tavakkalchilik "Jizzax-Kenteks" zarariga ishladi hamda AGMK deyarli bo‘sh qolgan darvozaga yana 3ta to‘p kiritib, hisobni yirik ko‘rinishga keltirdi — 9:5.

Shu tariqa, AGMK futzal klubi O‘zbekiston superkubogini qo‘lga kiritdi.

Futzal. O‘zbekiston superkubogi.
AGMK - "Jizzax-Kenteks" - 9:5 (3:3)