«Vulverxempton» avvalgi seshanba kuni Angliya Liga kubogidan o‘rin olgan oddiy o‘yinda «Preston»ni 2:1 hisobida yengdi.
Bu uchrashuvda e’tiborni tortish imkoniyati kam edi, lekin Raul Ximenes tufayli hammasi boshqacha bo‘ldi. Aniqrog‘i, meksikalik legioner golni g‘ayrioddiy tarzda nishonlab, o‘yin reytingini biroz ko‘tardi...
Raul Ximenes «Preston» darvozasini 8-daqiqadayoq nishonga oldi. Meksikalik hujumchi avvaliga gol quvonchini jamoadoshlari bilan baham ko‘rdi, xususan, assistent rolini bajargan Rayan Ayt-Nuriga alohida minnatdorchilik bildirdi. U shundan so‘ng qaroqchi obraziga kirib, antiqa shou ko‘rsatdi. Qiziq, Raul oniy lahzalarda changakni qayerdan oldi, ko‘z niqobinichi? Ma’lum bo‘lishicha, u changakni qopchaga solib, darvoza ortiga ilib qo‘ygan ekan. Ta’sirli holat. Ko‘z qismiga tortgan bog‘ichi esa - 2020 yilning noyabr oyida orttirilgan bosh suyagi jarohatidan esdalik. Futbolchi o‘shanda ma’lum vaqt maxsus himoya niqobi bilan o‘ynagandi.
Umuman olganda, Ximenes faoliyatining oxirigacha bosh uchun mo‘ljallangan shu himoya vositasidan foydalanadi, hattoki, uni mashg‘ulotlarda ham yechmaydi. Ammo qora sochlari orasida mato deyarli ko‘rinmasdi. Niqob bandajning yengil xili bo‘lib, jarohatlangan suyak hududini qoplaydi. Hujumchi o‘tgan yili maydonga qaytgan vaqt dubulg‘a shaklidagi himoya vositasini ham taqqan edi. Lekin keyinroq bosh bilan zarba berishda to‘p yo‘nalishini to‘g‘ri ololmayotganini aytib, undan bosh tortdi. Shu tariqa alohida niqob taqishga o‘rgandi va jamoadoshlaridan «qaroqchi» laqabini oldi. Meksikalik futbolchi yozda o‘z golini shu niqobni ko‘ziga tortgan holda nishonlagandi, ammo qo‘liga changak olgan emasdi. Endi bu matoh sahna ko‘rinishini sezilarli darajada boyitdi…
