“Andijon” jamoasi “Buxoro” ustidan muhim uch ochkoni qo‘lga kiritganidan keyin odatga ko‘ra matbuot anjumani uyushtirildi.
Unda jamoa ustozi Viktor Kumikov jurnalistlarning savollariga javob qaytardi.
- Ba’zi o‘yinchilarimiz, masalan Milich biz bilan 10-15 kun birga shug‘ullanmadi. Shunday vaziyatda ham o‘yinni oxirigacha ushlab turdik va g‘alabani saqlab qolishga erishdik. O‘ylagan rejalarimiz amalga oshdi. Raqibni yo‘qotadigan narsasi yo‘q edi. Hujumga va standartlarga ko‘proq e’tibor qaratgan holda o‘yin tashkil qildik. Shuningdek, qanotlardan ham hujumlarga o‘tdik va bu o‘z natijasini berib gol urdik. Eng asosiysi, vazifani bajardik.
- Muxlislarsiz o‘yin yoqdimi?
- Ishqibozlarsiz o‘ynaganimiz albatta bilindi. Xuddi yig‘in paytida o‘ynagandek o‘ynadik. Holbuki, muxlislar qarshisida baqir-chaqirlar bilan o‘ynashning gashti boshqacha.
- “Andijon” 1-o‘ringa yanada mustahkamlashdi. Hozirdan keyingi mavsum uchun rejalar tuzyapsizmi?
- Kelinglar, avval vazifamizni 100 foiz rasmiylashtirib olaylik. Hozircha 90 foizga ega deb o‘ylayman (kuladi). Yana ikkita o‘yinni yutib olaylik, keyin rejalar haqida gaplashsak bo‘ladi. Rejalar xususida oldindan biror nima deyish qiyin. Ertaga nima bo‘lishini bilmaymiz. Ko‘p narsa rahbariyatga bog‘liq.
- Keyingi o‘yin “Xorazm” bilan o‘tadi. Bu uchrashuv ham qiyin bo‘ladi...
- Moliyaviy qiyinchiliklar bo‘lishiga qaramay, jamoamiz yaxshi o‘yin ko‘rsatyapti. Boshqa jamoa shunday o‘yin ko‘rsatarmidi? Yigitlarimiz yaxshi ruhlanishi evaziga munosib o‘yin ko‘rsatishyapti.
- O‘yin oxirida birdaniga 3 nafar futbolchini almashtirdingiz, bunday o‘zgarishga kam qo‘l urardingiz...
- Bu taktik o‘zgarishlar edi. Biz sxemani o‘zgartirishga qaror qilgandik. Yoshlarga imkoniyat berdik. Axir ular ham o‘ynashi kerak-ku!
- Stadion “projektori” nima bo‘lyapti?
- Albatta, “projektorlar” bilan muammo bor. Bizga yig‘ilishda, kelasi yili agar stadionlar tayyor bo‘lmasa, o‘yinlarga ruxsat berilmasligini aytishgan. Bu yerda klub rahbari Jur’atbek Dilshodbekovichga oson tutib bo‘lmaydi. Chunki uning bir o‘ziga qiyin. Superligada viloyat rahbariyati ham jamoaga katta yordam berishi kerak. Bitta odamni o‘ziga oson emas. Agar viloyat rahbariyati ham yordam bersa, ko‘p narsa yanada ijobiy tomonga o‘zgarishi mumkin.
