Sport Bild xabariga ko‘ra, "Chelsi" kelayotgan qishki va yozgi transfer oynalarida yangi o‘yinchilarni sotib olish uchun deyarli 500 million yevro sarflashni rejalashtirmoqda.

"Chelsi"ning yangi xo‘jayini Todd Bouli o‘z jamoasiga Bundesliga va Premyer-liganing yulduz futbolchilarini olib kelmoqchi.

"Leypsig" yarim himoyachisi Kristofer Nkunku "Chelsi" uchun tibbiy ko‘rikdan o‘tgani va shu noyabr oyida Qatarda bo‘lib o‘tadigan Jahon chempionati boshlanishidan oldin besh yillik shartnoma imzolanishi haqida mish-mishlar tarqaldi. Transfer narxi 60 million yevroga baholanmoqda, bu fransuzning yangi shartnomasidagi tovon puliga to‘g‘ri keladi.

Xorvatiyalik himoyachi Yoshko Gvardiol ham “Leypsig”dan transfer qilinishi kutilmoqda. Uning transferi o‘tgan yozda amalga oshishi kerak edi, biroq xorvatning ko‘chib o‘tishga tayyor emasligi tufayli bu amalga oshmay qoldi. Kelgusi yozda 80 million yevrolik transferga hech narsa xalaqit bermasligi kerak.

"Chelsi"ning yaqinlashib kelayotgan transfer oynalaridagi asosiy maqsadi Dortmundning "Borussiya" klubi yarim himoyachisi Jud Bellingem bo‘lib turibdi. London klubi yosh ingliz futbolchisi uchun Premyer-liga va La Ligadagi boshqa klublardan raqobatda g‘alaba qozonish uchun 120 million yevrodan ko‘proq pul sarflashga tayyor.

“Ko‘klar” 170 million yevroga baholangan “Vest Xem” yarim himoyachisi Deklan Raysni ham o‘z safiga qo‘shib olmoqchi.

"Chelsi" ro‘yxatidagi yana bir Bundesliga futbolchisi "Bavariya" himoyachisi Benjamin Pavar ham bor. Uning transferi 30 million yevroga baholangan.