Ronalduning «Everton» darvozasiga urgan golini nishonlashi virusga aylanib ketdi – turli futbolchilar, yoshlar takrorlashni boshlab yuborishdi. Lekin aynan mana shunday usulda nishonlash sababi sir qolayotgandi.

Ko‘pchilik buni nihoyat APLda mavsumdagi ilk golini urgan Ronalduning xotirjam tortishi bilan izohlagandi, ammo unday emas ekan. “Manchester Yunayted”ning rasmiy saytida buning izohi ochiqlandi.

Gap shundaki, Krishtianu doim “Yunayted”dagi yosh futbolchilarga uyquga e’tibor berish kerakligi, bu sport formasini ushlab turishda juda muhim ekanini uqtirar ekan. U bu haqida shu darajada ko‘p va takroran gapirganki, yosh futbolchilar bu haqida xazil gaplar qilishni boshlab yuborishgan.

Ronaldu asosan ikki pozada – “murda” va “embrion” ko‘rinishida uxlashini aytgan va golni nishonlash chog‘ida, o‘sha pozalardan birini namoyish qilgan.