"Jizzax Kenteks" futzal jamoasi sardori Dilshod Rahmatov Xorazmda o‘tgan tur o‘yinlari haqida o‘z fikrlari bilan o‘rtoqlashdi.

"To‘g‘risi, Xorazmga masofa uzoq ekanligi bois biroz xavotir bor edi. Ammo, logistika borasida muammoga uchramadik. Urganchdagi zal ham ideal ekanligini ta’kidlagan bo‘lar edim. Albatta, Toshkentdagi darajada bo‘lmasligi mumkin, biroq, kiyim almashtirish xonalaridagi sharoitni e’tirof etish kerak.

Bundan tashqari, deyarli barcha jamoalar tur bahslari yakunlanganidan so‘ng Xiva shahridagi obidalarga tashrif buyurib, ziyorat qilishdi. Ham tur o‘yinini o‘tkazib, ham sayohat qilish – bu shunchaki ajoyib. Kelgusida ham Urganchda bellashuvlar bo‘lib o‘tsa, yaxshi bo‘lar edi", — dedi Rahmatov.