Bugun Qarshi shahridagi “Markaziy” stadionda ayollar futboli bo‘yicha O‘zbekiston kubogi finali oldidan matbuot anjumani bo‘lib o‘tdi. Uning ikkinchi qismida “qaldirg‘ochlar” ustozi Elmira Gulamova ishtirok etib, o‘z fikrlari bilan o‘rtoqlashdi.

"Avvalambor barcha qarshilik muxlislarni “Nasaf” jamoasining O‘zbekiston kubogini qo‘lga kiritgani, “Sevinch” jamoasining esa mamlakat chempioni bo‘lgani bilan tabriklayman!

Hammamiz tushunib turibmiz. Ertaga final. Bungacha Jizzaxda chempionatning og‘ir o‘yinini o‘tkazdik. Afsuski, “So‘g‘diyona-W” bilan bo‘lgan uchrashuvda kichik hisobda imkoniyatni boy berdik.

Albatta, o‘tgan o‘yinni tahlil qildik va tegishli xulosamizni chiqardik. Shuningdek “Sevinch” bilan o‘tkazilgan o‘yinlarni ham tahlil qildik va mana Qarshiga keldik.

Umid qilamanki, ertaga barcha futbol ishqibozlari ayollar futboli ham tomoshabop ekanligiga guvoh bo‘lishadi. Chunki, mamlakatimizning ikki yetakchi jamoasi ertaga finalda maydonga tushadi. Ertaga muxlislar qiziqarli o‘yin guvohi bo‘lishadi", — dedi Gulamova.