Mavsumning o‘rtasiga ham yetganimiz yo‘q. Shunga qaramay, bugun Yevropadagi kuchli beshlik chempionatlarining eng sermahsul hujumkor futbolchilari ro‘yxatini tuzib chiqmoqchimiz. Quyida "Transfermarkt" portali bergan ma’lumotlarga asoslanib, futbolchilarning gol va assist tizimidagi umumiy natijalari e’lon qilinadi.
Jonatan Devid (11)
Yevropaning gigant jamoalari Devidni "Lill"dan sotib olmaganiga hayron bo‘lsangiz arziydi. Kanadalik hujumchi bu mavsumda o‘z hisobiga 9 ta gol va 3 ta assistni yozdirib qo‘ya oldi. Devid keyingi yozda kattaroq klubga o‘tsa kerak. Harxolda, uning natijalari shunga ishora qilmoqda.
Xarri Keyn (12)
Angliya terma jamoasida borgan sari jarohatlar bilan bog‘liq muammolar ko‘zga tashlanmoqda. Ammo Sautgeyt markaziy hujumdan xavotir olmasa ham bo‘ladi. Keyn ayni damda sport formasida va APLni yondirishni davom ettirmoqda. "Shporlar" yetakchisining hisobida hozirga qadar 11 ta va 1 ta assist mavjud.
Kevin De Bryuyne (13)
De Bryuyneni APL tarixidagi eng yaxshi yarim himoyachi desak, xato bo‘lmaydi. Belgiyalik yulduz har hafta yakunida o‘z hisobini to‘ldirib boradi. Uning Erling Xoland bilan maydondagi til topishuvi, e’tirofga molik jihatlardan biridir.
Kilian Mbappe (13)
Ushbu ro‘yxatdan joy olishi kutilgan nomlardan biri Kilian Mbappedir. U bu mavsumda 11 gol va 2 ta assistga mualliflik qilishga ulgurdi. Shu yo‘sinda Mbappe navbatdagi mavsumda ham Fransiya chempioni bo‘la oladi.
Jamal Musiala (13)
19 yoshli futbolchi Londonda topmagan qadrini Myunxenda tikladi. Musiala 12 ta Bundesliga o‘yinida 8 ta gol va 5 ta assistni o‘z hisobiga yozdirib qo‘ygan. Musialaning sa’y-harakatlari bilan "Bavariya" bu mavsumda ham chempionlikni tantana qilishi mumkin.
Xvicha (13)
Barcha musobaqalarni qo‘shib hisoblaganimizda gruziyalik hujumchining hisobida jami 20 ta gol mavjud. U shulardan 6 tasini A seriyada urgan. Xvicha Kvarasxeliyada, shuningdek, ichki chempionatda 7 ta assist ham mavjud.
Lionel Messi (17)
Messining Parijdagi ilk mavsumi ancha past notada boshlangandi. U 14 assist va 6 ta gol bilan o‘sha davrni tugatdi. Ammo Jahon chempionati yaqinlashgani sari biz yana sermahsul Messini ko‘ra boshladik. Argentinalik hozirga qadar 10 assist va 7 ta gol ijro etdi.
Levandvoski (17)
Garchand "Bavariya"dan "Barselona"ga yo‘l olgan bo‘lsada, polshalik gol mashinasining darajasi hech ham pasaygani yo‘q. Robert 13 ta gol va 4 ta assistga erishgan. Bu orqali u "Nou Kamp"ning sevimli nomlaridan biriga aylandi.
Neymar (20)
Neymar bundan 6 oy oldin "PSJ"dan ketishi mumkin edi. Mbappe u bilan o‘ynashni istamay qolgani sababli, bu voqea yuz berishi kerak bo‘lgan. 30 yoshli hujumchi esa bunga yangi mavsumdagi fantastik harakatlari bilan javob berdi. Braziliya terma jamoasi a’zosi hozirga qadar Liga 1 da 11 ta gol va 9 ta assist ijro etgan.
Xoland (21)
Endigina noyabr oyi boshlandi. Ammo Erling Xoland ismli hujumchi allaqachon APLda o‘ynab yurgan futbolchi kabi harakat qilmoqda. Himoyachilar qo‘rqinchiga aylangan norvegiyalik, o‘zining aqlbovar qilmas mahsuldorligi bilan hammani og‘zini lang ochib qo‘ydi. 22 yoshli hujumchi hisobida APLning o‘zida 18 ta gol va 3 ta assist mavjud. Bizningcha, hali bu boshlanishi (bo‘lsa kerak).
ISMATOV J.
