Bugun, 18 dekabr kuni Qatardagi “Lusail Aykonik” stadionida jahon chempionati final uchrashuvi bo‘lib o‘tadi. Janubiy Amerika vakili Argentina terma jamoasi va Yevropa vakili Fransiya terma jamoalari to‘qnash kelishadi.
Jahon chempionatlarining final bosqichida bunday qarama-qarshilik 11-marta bo‘lib o‘tadi. Bu haqda Opta portali xabar bermoqda. Avvalgi 10 ta holatdan yettitasida Janubiy Amerika jamoalari g‘alaba qozongan.
Argentina terma jamoasi sakkiz yil ichida ikkinchi marta jahon chempionati finaliga chiqdi. 2014 yilda argentinaliklar Germaniyaga qo‘shimcha bo‘limlarda mag‘lub bo‘lishdi. Fransiya amaldagi jahon chempioni hisoblanadi. Rossiyadagi turnirda fransuzlar Xorvatiyani mag‘lub etishgandi.
