O‘zbekistonda transfer oynasi ochilganidan so‘ng “Qo‘qon-1912” jamoasining yetakchi futbolchilariga yurtimizning grand jamoalaridan takliflar bo‘lmoqda.
"Jamoamiz yetakchilaridan biri, 23 yoshli futbolchilari o‘rtasida Osiyo chempioni Oybek Rustamovga ham mana shunday takliflar ko‘plab bo‘ldi. “Qo‘qon-1912” jamoasi Oybek Rustamovning yuqori sport formasini ushlab turish hamda unga kuchlilar safida o‘yin amaliyoti taqdim qilish, shuningdek Osiyo chempionlar ligasi o‘yinlarida ishtirok etishini ta’minlash maqsadida Olmaliqning AGMK jamoasiga bir yil muddatga ijaraga berishga qaror qildi. Xabaringiz bor AGMK jamoasi kelasi mavsumda Osiyo chempionlar ligasida o‘ynash huquqini qo‘lga kiritishgan. Shu maqsadda AGMK jamoasi rahbarlari jamoani kuchaytirish uchun Oybek Rustamovning xizmatlariga qiziqish bildirdi. Har ikki jamoalarning o‘zaro kelishuvlariga asosan Oybek Rustamov AGMK jamoasida 2023 yilning 31 dekabr sanasiga qadar ijara asosida to‘p suradi. Rustamovning transferi bo‘yicha barcha huquqlar “Qo‘qon-1912” jamoasida saqlanib qoladi. Jamoamiz nomidan Oybek Rustamovga yangi jamoasida omad tilaymiz!" - deyiladi qo‘qonliklar rasmiy bayonotida.
