"Barselona" hujumchisi Memfis Depay "Manchester Yunayted"ga qaytishi mumkin.
Niderlandiyalik hujumchining qaytishiga "Manchester Yunayted" qiziqish bildirmoqda. Futbolchining o‘zi ham Premyer-liga klubiga o‘tishga qarshi emas. Uning Kataloniya klubi bilan amaldagi shartnomasi 2023 yilning yoziga qadar mo‘ljallangan.
Hujumchi avvalroq 2015 yildan 2017 yilgacha "qizil iblislar" safida to‘p surgan. U 53 ta uchrashuvda qatnashib, 7 ta gol urdi va 6 ta golli uzatmani amalga oshirdi.
Joriy mavsumda 28 yoshli hujumchi “Barselona” safida 8 ta o‘yin o‘tkazib, 4 ta gol urdi va bitta golli uzatmani amalga oshirdi. Transfermarkt portaliga ko‘ra futbolchining narxi 20 million yevroga baholanmoqda.
