Alisher Nikimbayev Jahon Chempionatida tashkilotchiligidagi qiyinchiliklar haqida gapirdi.

"Bizning asosiy vazifamiz stadionlar talablariga javob berish edi. Sizga bir misol keltiraman, e’tibor bergan bo‘lsangiz, 8 ta stadiondan bittasi, «Halifa» stadioni, yengil atletikaga mo‘ljallangan. Shu sababdan stadion maydoni atrofida juda katta joy mavjud. Zaxirada o‘tiradigan futbolchilar va murabbiylarning turadigan joyi maydondan sal uzoqroqda joylashib qolgandi.

Barcha stadionlarda bu masofa 8 metrdan uzoq bo‘lmagan. «Halifa»da esa bu masofa 17 metr edi. Biz muxlislar o‘tiradigan bitta qatorni olib tashlashga majbur bo‘ldik. Bitta qator chiptalari sotilmagan bo‘lsa, «Halifa»da 8 ta o‘yin o‘tkazildi, bu FIFAga yarim million zarar keltirgan. Bitta qatorni o‘zi shuncha zararga ishlagan.

Bu 17 metrga jamoalar bahslashmadi. Faqatgina Niderlandiya terma jamoasi norozilik bildirdi. 71 yoshli Lui van Galning kasalligi ham bor, uni tushunish kerak. Bu 17 metr unga uzoqlik qilgan. U uzoq vaqt tik oyoqda tura olmas ekan, shuning uchun sal yaqinroqqa suringlar, deya taklif bildirdi. Hattoki 1 metrga surmoqchi bo‘lsangiz ham, hamma kabellarni qaytadan ulash, barcha ishlar qaytadan qilinishi lozim. Bu 2-3 kun vaqtni olardi. Biz van Galga noiloj rad javobini berdik", — dedi Alisher Nikimbayev.