Bugun «Shaxtyor» yarim himoyachisi Mixaylo Mudrik rasman Londonning «Chelsi» klubiga o‘tdi. Transfer 70 million yevroni tashkil etdi, yana 30 million yevro bonus sifatida taqdim etiladi.
Shu tariqa Mudrik 2006 yilda yana bir ukrainalik Andrey Shevchenko tomonidan o‘rnatilgan transfer rekordini yangiladi. O‘shanda «Milan»dan «Chelsi»ga o‘tgan Shevchenko postsovet mamlakatlarining o‘yinchilari ichidagi eng qimmat xaridga aylangandi. Transfermarkt ma’lumotlariga ko‘ra, «ko‘klar» o‘shanda futbolchi uchun 43,8 million yevro to‘lagan.
Mudrikning sotilishi «Shaxtyor» uchun ham rekord o‘rnatdi – klubning avvalgi rekordi braziliyalik yarim himoyachi Fred bo‘lib, u 2018 yilda 59 million yevro evaziga Angliyaning «Manchester Yunayted» klubiga o‘tgan edi.
