Niderlandiyaning Veyk-an-Zee shahrida o‘tkazilayotgan shaxmat bo‘yicha «Tata Steel-2023» nufuzli xalqaro turnirida bugun 8-tur o‘yinlari o‘tkazildi.

Nodirbek Abdusattorovga bu safar AQSHlik Levon Aronyan raqiblik qildi. Bahs boshidanoq durangga mos bo‘ldi. Aronyan bir vaziyatda farzinlarni almashishni 3 marta taklif qilganidan so‘ng hamyurtimizda bu taklifga rozi bo‘lmasdan iloj qolmadi. Shunga qaramay, Nodirbek g‘alaba uchun harakat qildi, ammo tomonlar yakunda durangga imzo chekishdi.

O‘zbekistonlik sportchi o‘z ochkolarini 6,0 taga yetkazdi va peshqadamlikni o‘zida saqlab turdi. Ushbu turda hamyurtimizning ta’qibchilari — Anush Giri va So Uesli durang qayd etishdi. Natijada oradagi farq 1 ochkoligicha qoldi. Magnus Karlsen esa ketma-ket ikkita g‘alabadan so‘ng o‘z ochkolarini 4,5 taga yetkazgan holda jadvalda 4-o‘ringa ko‘tarilib oldi.

Abdusattorov 24 yanvar, dushanba kuni germaniyalik Vinsen Keymarga qarshi qora donalarda o‘ynaydi.