Angliya Premyer-ligasining kamida ikki klubi sotilishi mumkin. Shunday vaziyatda barcha 20 ta jamoaning narxlar ro‘yxati taqdim etildi. "Manchester Yunayted"ga rasmiy taklif bilan chiqish muddati bugun o‘z nihoyasiga yetishi kutilmoqda. Bu klub uchun dunyoning millarderlari da’vogarlik qilib turibdi. Kuni kecha chiqqan xabarda aytilishcha, asli eronlik bo‘lgan AQSH millarderi Jaxm Najafi "Tottenxem"ni sotib olishga jiddiy qiziqish bildirib turibdi. Bu ikki klub APLning eng qimmat jamoalaridan hisoblanadi. Quyida sport-biznes nashri bo‘lgan "Sportico" tomonidan taqdim etilgan narxlari ro‘yxatini bilib olishingiz mumkin.
Ro‘yxat avvalida "Manchester Yunayted" nomi keltirilgan. Klub 4.8 milliard funtga baholangan bo‘lib, jamoaning 2022 yildagi sof foydasi 583.2 million funtni tashkil etgan. Biroq, klub egalari bo‘lgan Gleyzerlar oilasi "MYU" uchun 6 milliard narx belgilagan va bu asli narxdan ancha ko‘pdir.
Aynan yuqoridagi holat "Tottenxem" misolida ham yuzaga chiqadi. "Shporlar" egasi hisoblangan Jo Lyuis 4-4.5 milliard funt istayotgan bo‘lsa, "Sportico" keltirgan ma’lumotlarda "Tottenxem" atigi 2.57 milliardga teng.
"Manchester Yunayted"dan keyingi o‘rinlarda "Liverpul", "Manchester Siti", "Arsenal" va "Chelsi" qayd etilgan. Ulardan keyingina "Tottenxem" nomi keladi. Kuchli oltilikdan tashqaridagi eng qimmat klub sifatida "Vest Xem" e’tirof etiladi. "Bolg‘achilar" bahosi 535 million funtga teng. Ro‘yxatning eng quyi pog‘onasida "Bornmut" turibdi. "Olchalar" narxi bor-yo‘g‘i 115 million funtni tashkil etgan. Shuningdek, "Nottingem", "Brentford" va "Brayton" ham nisbatan eng kam baholangan klublar orasidan o‘rin olgan.
Turnirning barcha klublari jamlangan narxi o‘nlab milliard funtni tashkil etgan. Yuqoridagi rasmda batafsil ma’lumot olishingiz mumkin bo‘ladi.
ISMATOV J.
