O‘zbekiston Professional futbol ligasi talablari asosida Superliga uchrashuvlarini qabul qilish uchun respublikaning 4 ta shahrida joylashgan stadionlar maydoni va projektorida ta’mirlash ishlari davom etayotgandi: Andijon, Olmaliq, Jizzax, Termiz. May oyida Jizzaxdagi stadion qayta foydalanishga topshiriladi.
“So‘g‘diyona” stadioni 2022 yilgi mavsumda tarixda ilk bor OFK kubogi uchrashuvlarini qabul qildi. Shundan so‘ng stadion maydoni, uning drenaj va sug‘orish tizimini zamonaviy ko‘rinishga keltirish harakatlari boshlandi. Liga maydon tayyor bo‘lguniga qadar “So‘g‘diyona” futbol klubi ishtirokchidagi uy uchrashuvlari Zominda o‘tishi yuzasidan qaror qabul qildi.
Bugunga kelib “So‘g‘diyona” stadionida barcha zarur ishlar amalga oshirilgan bo‘lib, maydon chimi mayning dastlabki o‘n kunligida futbol uchrashuvlarini qabul qilish uchun to‘la tayyor bo‘ladi. Shundan kelib chiqib, klub hamda Liga o‘zaro kelishgan holda Superliga 10-turidan joy olgan “So‘g‘diyona” — “Turon” uchrashuvi bilan “So‘g‘diyona” stadioniga qaytishni rejalashtirdi. Stadion projektorlari OFK talabiga javob beradi.
“So‘g‘diyona” — “Turon” uchrashuvi 13 may shanba kuni bo‘lib o‘tadi.
