"Manchester Yunayted" Xarri Keynni qo‘lga kiritish uchun birinchi qadamlarni tashlamoqda.

The Telegraph xabariga ko‘ra, mankunianliklar transfer jarayoniga tayyorgarlikni boshlab yuborishgan. Klub bu transfer qanchaga tushishi va "Tottenxem" rahbari Deniyel Levi bilan qanday muzokara olib borishni aniqlamoqchi.

Keynning "shporlar" bilan shartnomasi 2024 yilgacha mo‘ljallangan. Shu bilan birga, "Tottenxem"dagi manbalarning fikricha, hujumchining yana bir mavsum klubda qolishi ehtimoli juda past.

Taxminlarga ko‘ra, Levi chet el klublaridan 80 million funt yoki undan ko‘proq pullik transfer takliflarini ko‘rib chiqishga tayyor, ammo ingliz klublaridan kamida 100 million funt so‘raydi va hatto Premyer-ligadan barcha takliflarni rad etishga qaror qilishi mumkin.

Keyn xizmatlariga "Bavariya" qiziqmoqda. Hujumchining o‘zi ham Premyer-ligada qolishni afzal ko‘rmoqda.

29 yoshli futbolchi joriy mavsum APLda 32 ta o‘yinda maydonga tushib, 24 ta gol va 2 ta golli uzatmaga mualliflik qilgan.