«Bavariya»ning ishi butun tarixda bu qadar orqaga ketmagan bo‘lsa kerak.
Myunxen klubi rahbariyati mart oyi oxirida bosh murabbiy Yulian Nagelsmannga javob berib, o‘rniga Tomas Tuxelni tayinladiyu, o‘zini o‘tga tashladi go‘yo. Har holda, «Bavariya» muxlislari bugungi rahbariyatning ishidan mutlaqo norozi. Boshqacha bo‘lishi ham mumkin emas. Axir jamoa qisqa vaqtda Germaniya kubogi va CHLda kurashdan chetga chiqdi, endi esa Bundesliga bosh sovrini - «Kumush lagan» ham qo‘ldan chiqadigandek...
Myunxenlik muxlislar CHL 1/4 finalidan o‘rin olgan «Manchester Siti»ga qarshi javob o‘yini (1:1)da rahbariyatga bor e’tirozlarini to‘kib solishdi. Deylik, «Alyans Arena» tribunalaridan birida keskin matnli banner ko‘zga tashlandi: «Maqsadga erishmaslik mumkin, prinsiplarni yo‘qotish - yo‘q! Klub siyosati bo‘yicha savollar bor!» Yana bir banner to‘g‘ridan-to‘g‘ri klub sport direktori Hasan Salixamijich va bosh direktori Oliver Kanga ataldi: «Brazzo(Salixamijichning laqabi) va Kan — kechagi kun qahramonlari, bugungi mag‘lublar». Sobiq darvozabon o‘yindan keyin bunga munosabat o‘laroq, rahbariyat har doim savollarga javob berishga tayyorligini aytdi.
Ayrim manbalarda yozilishicha, Myunxen klubi CHLdan chiqib ketgani ta’sirida rahbariyat Kan bilan o‘rtadagi shartnomani muddatidan oldin bekor qilish haqida o‘ylay boshladi. Binobarin, Yulian Nagelsmanni iste’fosi va Tomas Tuxel tayinlovida eng katta rolni aynan Kan bajargandi. To‘g‘ri, Oliverning o‘zi ketishni xayoliga ham keltirayotgani yo‘q.
«Yagona maqsadim - mavsumni chempionlik sovrini bilan yakunlash. Keyin, yangi mavsumda yana hujumga o‘tish», - dedi Kan «Mayns»ga qarshi navbatdagi omadsiz o‘yin (1:3)dan so‘ng.
U shuningdek, oxirgi natijalar murabbiylar shtabidagi o‘zgarishlarga bog‘liq emasligini ta’kidlamoqda:
«Qanday mavhumlik va ishonchsizlik haqida gap ketyapti? Shunchaki, maydonda yetarlicha ishlamayapmiz. Futbolchilar bilan turli variantlarni qo‘llab ko‘rdik. Ma’lum vaqtda hamma mas’uliyatni o‘z zimmasiga olishi kerak. Tomas Tuxel - muhokama markaziga tushishi mumkin bo‘lgan oxirgi odam. U jamoani harakatga solish uchun qo‘lidan kelganini qilmoqda. Yo‘q, tanqiddan qo‘rqmayman. Faoliyatim davomida ko‘p narsalarni boshdan o‘tkazganman. Hozirgi omadsizlikka qaramay, joriy mavsum Bundesligani yana chempion sifatida yakunlashimiz mumkin».
