Bugun tunda APL 28-turining qoldirilgan bahsi doirasida «Man Siti» o‘z maydonida «Vest Xem»ni qabul qiladi. Ko‘rinishidan markaziy uchrashuv afishasini taqdim etsada, biroq g‘arbiy londonliklarning joriy mavsum unchalik ishlari yaxshi emas. Ular ayni dam 15-o‘rinni egallagan holda quyi zonaga juda ham yaqinlashib qolgan. «Shaharliklar» esa aksincha «Arsenal»ga muhim pallada bosim qilish oqibatida yana birinchi o‘ringa qaytdi.
«Man Siti»
Yakshanba kuni jamoa «Kreyven Kottej»ga safar qildi hamda u yerda «Fulxem»ni kichik hisobda taslim qildi (2:1). Bunga Erling Xoland ham o‘z hissasini qo‘shdi. Gollarning biriga mualliflik qilgan norvegiyalik Angliyadagi 50-golini nishonladi hamda 92 yillik qiziq natijani qayd etdi. Yaqin o‘tmishda hech kim bu ishni uddalay olmagan. Xolandda hozir Premyer-liganing 34 ta goli mavjud (xuddi Endi Koul hamda Alan Shirer kabi). Urilajak birgina gol uni APL bir mavsumi uchun mutlaq yetakchiga aylantiradi. «Fulxem» ustidan qo‘lga kiritilgan g‘alaba «Siti» uchun ketma-ket 8-si hisoblanib, jamoa 72 kun deganda yana birinchi o‘ringa qaytdi.
To‘g‘ri, Pep jamoasi kerakli pallada ishonchni oqlamoqda, yirik hisobdagi g‘alabalar qo‘lga kiritilmoqda, ammo jamoa o‘z darvozasi daxlsizligini saqlab qolishda muammolarga uchrayapti. Masalan, so‘nggi 12 bahsning atigi 2 tasida Ederson ishonchni oqlagan. Umumiy 32 ta o‘yinning 10 tasida jamoa gol o‘tkazmagan xolos, bu 31%ni tashkil qiladi. Biroq old chiziq juda zo‘r ishlagani uchun himoya va darvozadagi ayrim xatolar bilingani yo‘q. «Siti» top klublarga qarshi 14 o‘yindan beri mag‘lub bo‘lmayapti, ularning 11 tasida g‘alaba qozongan (uning ichiga avgustda «London» stadionidagi muvaffaqiyat ham kiradi). «Shaharliklar» «bolg‘achilar»ga qarshi «Etihad»da juda yaxshi an’anaga ega - so‘nggi 6 ta bahsda g‘alaba qozonilgan. «Vest Xem»ga qarshi to‘planishi kerak bo‘lgan 48 ochkodan 43 ta yig‘ilganmi demak «Siti»ga bugun qiyin bo‘lmaydi. Buning ustiga haftaning ma’lum bir kunida yayrab o‘ynaydigan «Man Siti»chalik omadli jamoa yo‘q. Ya’ni «shaharliklar» chorshanba kuni o‘tgan 24 bahsning hammasini yutgan. Bu liganing mutlaq rekordidir.
«Vest Xem»
23 aprelda «Bornmut»ni 4:0 hisobida yengganidan so‘ng londonliklar yana yomon ahvolga tushib qoldi. Undan uch kun o‘tib jamoa «Liverpul»ga yana uch kun o‘tib esa «Kristal Pelas»ga yengildi. Qizig‘i, har ikkala bahsda ham dastlab jamoa oldinda bo‘lgan. Hozirda londonliklarni so‘nngi uchtalikdan 5 ochko ajratib turibdi. Demak, qolgan 6 o‘yin Moyes uchun finalga aylanishi kerak. Biroq shotlandiyalik murabbiyni juda ham tig‘iz taqvim kutmoqda. Keyingi hafta Manchesterning boshqa jamoasini uyda qabul qilsa, o‘sha haftani ichida Konferensiyalar ligasi yarim finalining ilk uchrashuvida «Az Alkmar» bilan o‘yin bor. «Man Siti»ga qarshi «Vest Xem» so‘nggi 16 bahsda atigi 4 ochko jamg‘argan. Oxirgi g‘alaba 2015 yil sentyabrga to‘g‘ri keladi.
Yangiliklar
«Siti» uchun Ake bugun safga qaytishi kerak. Biroq bu aniq emas. Uning o‘rnini bir necha uchrashuvlardan beri Akanji egallamoqda. Biroq o‘tgan o‘yinni o‘tkazib yuborgan De Bryuyne hali mashg‘ulotlarda qatnashmadi va uning o‘rniga Alvares tanlangan.
«Bolg‘achilar»da esa Kurt Zuma o‘tgan bahsda safdan chiqqan bo‘lib, Moyes uning bir-ikki haftani o‘tkazib yuborishini rasman tasdiqladi. Janluiji Skamakka tizzasidan jarrohlik amaliyotini o‘tkazgan.
