Tinib-tinchimas muxlislar nimalarni o‘ylab topishmaydi-ya...

Mana, «Napoli» logotipi samoda «chizildi» - uchuvchi fanatdan skudetto sharafiga kreativ yondashuv. Neapol jamoasi uzoq kutilgan chempionlikni 4 may kuni rasmiylashtirdi, lekin shaharda bayram hamon bardavom. Neapolliklar Luchano Spalletti drujinasi zafarini nishonlashda original g‘oyalari bilan ham ajralib turishibdi. Samolyotda shahar ustidan uchib o‘tish asnosida «Napoli» logotipini aks ettirish harakatiga nima deysiz?

Samolyot parvozlarini kuzatib boruvchi flightradar24 sayti 9 may kuni «Napoli» muxlislaridan biri g‘alaba sharafiga o‘ta kreativ harakatni amalga oshirganini oshkor qildi. Tecnam P-2008JC samolyotida Kapua (Neapoldan 28 km. uzoqdagi shaharcha)dan havoga ko‘tarilgan uchuvchi fanat Neapol ko‘rfazi tomon kurs oldi va trayektoriya bo‘yicha klub logotipi yuzaga keladigan tarzda aylanib chiqdi. Buning uchun samolyot havoda 1,5 soatdan ko‘proq uchdi. Aniqrog‘i, 98 daqiqa. Napolike.com xabarida aytilishicha, Tecnam P-2008JC - Italiyaning Tecnam Flight Academy kompaniyasi tomonidan ishlab chiqarilgan bir dvigatelli mini-samolyot. 40 yil oldin asos solingan kompaniya ikki o‘rindiqli samolyotlarning birinchi partiyasidayoq katta tijoriy muvaffaqiyatga erishgan. Har holda, 2500 mingdan ortiq uchish apparati sotilgan. Kapua shahrida joylashgan Tecnam Flight Academy guruhi haligacha yengil samolyotlar ishlab chiqarish bilan shug‘ullanadi.

«Napoli» logotipining havoda chizilgani ko‘rsatilgan surat soxta emasmi? Nahotki, mini-samolyotlar parvozi ham shunchalik batafsil kuzatilsa? Ijtimoiy tarmoqlarda hammasi shubhaga olingani bor gap. Yana kimdir nihoyat, AQSHning Netscape korporasiyasi (IT sanoatida 9 yil ishlagan, jumladan, mashhur Netscape Navigator brauzerini yaratgan)ni esga olgani xususida ham hazillar bor. Binobarin, korporasiya xuddi shunga o‘xshash logotipga ega edi.

Skrinshot raqamlashtirilgan flightradar akkauntida berilganini hisobga olsak, bu 99 foizga real parvoz chizgisidir. Uchish kuzatuvi xizmati qanday ishlashi ham tayin: yerda ko‘ngillilar olib yuradigan qabul qiluvchi moslama samolyotlardan maxsus qurilma yordamida uzatiladigan ma’lumotlarni oladi. Masalan, yo‘nalish, tezlik, balandlik. Yevropada xavfsiz parvozlarni ta’minlash uchun har bir mini va katta samolyot maxsus qurilma bilan jihozlangan. Shunday ekan, shaxsiy reyslar ham to‘liq kuzatiladi. Havaskor uchuvchilar buni bilishadi va ba’zan osmonda «chizgi» qoldirishadi.

Ehtimolki, parvoz vositasida klub logotipini aks ettirish «Napoli» chempionligi sharafiga uyushtirilgan eng ajib harakat ham emasdir. Deylik, nea­polliklar chempionlik rasmiylashtirilgan o‘yindan so‘ng Udinedagi «Friuli» stadioni chimini bo‘lak-bo‘lak qilib, taqsimlab olishdi. Esdalik uchunmi? Ehtimol. Lekin ayrimlar chempionlikka «guvoh» chim bo‘laklarini internetda sotuvga ham chiqarishdi. «Napoli» chempion bo‘lsa, yalang‘och holda ko‘rinish berishini aytgan muxlisa Karmen Kakavale esa butun tanasini klub ranglari bilan bo‘yash (bodi-art usuli) asnosida qaltis va’dasi ustidan chiqdi. Lekin samolyot va uning trayektoriyasi ham alohida holat, albatta.