“Andijon” – “Parvoz” (Tojikiston) o‘rtoqlik uchrashuvidan (5:0) keyin raqib jamoaning katta murabbiyi Jomi Muhitdinov “Andijon” matbuot xizmati uchun o‘z fikrlari bilan o‘rtoqlashdi.

— Uchrashuv borasida fikrlaringiz qanday?
— “Andijon” jamoasiga o‘yin uchun rahmat. Juda yaxshi jamoa ekan. Bu kabi o‘yinlar ko‘proq bo‘lsa, jamoalar uchun foyda bo‘ladi. Biz uchun ham bu o‘yin chempionatga tayyorgarlik vazifasini o‘tab berdi. Bizda chempionat davom etmoqda, turdan-turga tayyorgarlik ko‘ryapmiz.

— Umuman olganda, “Andijon” to‘g‘risida yana nimalarni ayta olasiz?
— Raqib yaxshi tayyorlangan jamoa ekan. Murabbiyning ishi ko‘rinmoqda. “Andijon” o‘yinlarini televizor orqali ko‘rib boraman, juda sifatli jamoa. Shunday o‘yin taklif qilgani uchun jamoa a’zolariga rahmat aytaman, bunday o‘yinlarimiz kelajakda ham davom etadi.

— Jamoamiz safida qaysi futbolchilarning o‘yinlari sizga ko‘proq yoqdi?
— 7 (Bobur Farhodov) va 8 (Farhod Bekmurodov) raqamdagi o‘yinchilar menga yoqdi, ancha tajribali o‘yinchilar ekan.

— 5:0 hisobini kutmagan bo‘lsangiz kerak-a?
— Ha, sizlar Superligadasizlar, biz birinchi ligadamiz. Hozirda chempionat davom etmoqda. To‘liq tarkibimiz yig‘ilmagan, ko‘plab futbolchilarimiz jarohat olgan, shuning uchun shunday natija ro‘y berdi.

“Andijon” matbuot xizmati.