Ispaniyaning “Barselona” jamoasi klubning bir qismini Qatar yoki Saudiya investorlariga sotishi mumkin.

El Chiringuito jurnalisti Xose Alvaresning ma’lum qilishicha, “ko‘k-anorranglilar” boshqaruv-huquqiy shaklni o‘zgartirish imkoniyatlarini ko‘rib chiqmoqda.

Hozirda “Barselona” rasman notijoriy tashkilot bo‘lib, to‘liq sosyoslarga — klub a’zolariga tegishli.

Kataloniyaliklar moliyaviy muammolarni hal qilish uchun klubning 49 foizini investision fondga sotmoqchi.

Buning uchun prezidenti Xoan Laporta so‘nggi haftada Saudiya Arabistonida bo‘lgan edi, hozir esa Qatarda bo‘lib turibdi.

“Jamoa boshqaruv modelini o‘zgartirish variantini ko‘rib chiqmoqda. Shu bilan birga so‘nggi so‘zni aytish baribir sosyoslarda qoladi. Vaziyat jiddiylashgani uchun ham kataloniyaliklar bu variantni ishga solmoqchi”, — deydi Alvares.

Eslatib o‘tamiz, “Barselona” moliyaviy muammolarga duch kelgani uchun so‘nggi yillarda bir nechta moliyaviy dastaklarni ishga solgandi. Aynan mana shu muammolar sababli, 2021 yilda Lionel Messi jamoani tark etishga majbur bo‘lgan.

Qayd etib o‘tish joiz, “Barselona” 2022/23 yilgi mavsum La Liga chempionligini qo‘lga kiritdi.