Hayotda shunday insonlar borki, umr davomi ilm-fan, ma’naviyat-ma’rifatga intilib yashaydilar.
Bundaylardan ilm ummonida yaratilgan bebaho xazina qoladi. Qarshi Muhandislik-iqtisodiyot instituti dosenti, qishloq xo‘jalik fanlari nomzodi, O‘zbekistonda xizmat ko‘rsatgan paxtakor, Antik dunyo xalqaro fanlar akademiyasi akademigi Chori Aslanov shunday betakror inson edi...
Qarshi tumani Potron qishlog‘ida tug‘ilib-ulg‘aygan Chori ota 81 yil umr ko‘rdi. Ota-onadan yosh qolganiga qaramay, opasi qarovida ilm-fan bilan shug‘ullandi, shuning barobarida futbolga ham vaqt ajratdi. «Garchi qishloq xo‘jaligi sohasi olimi bo‘lsamda, hayotimni futbolsiz tasavvur qilolmaymayman, - degandi Chori ota suhbatlarning birida. - Maktab davrida darsdan bo‘sh paytlar jamoa tuzib, beshkentlik tengdoshlar, keyinchalik qarshilik yoshlar bilan kuch sinashardik. Murosasiz o‘yinlarga yayov qatnasakda, toliqish nimaligini bilmaganmiz. Bu muhabbatimiz katta futbolga ham ko‘chdi. Sobiq ittifoq zamonida «Paxtakor» ortidan Piterdan Kavkazgacha, Boltiq bo‘yidan Kiyevgacha borganmiz, Moskvayu, Markaziy Osiyo shaharlarini goh poyezd yoki samolyot, kezi kelganda, yengil avtomobilda kezib chiqqanmiz. «Paxtakor» yulduzlari - Gennadiy Krasniskiy, Birodar Abduraimov, Mixail An, Vladimir Fyodorov, Vasilis Xadzipanakis o‘yinlaridan o‘zgacha zavqlanganimiz hamon yodimda. Tbilisida David Kipianining akasi bilan tanishib, gruzin futbolining o‘ziga xos jihatlaridan voqif bo‘ldim. «Spartak»ning Yevropa Chempionlar kubogidagi o‘yinlarini Moskvada kuzatdik, «Pomir» - «Paxtakor» o‘yinini ko‘rish uchun Dushanbega oilaviy safar qildik. Eh-he, muxlislik haqida xotiralarim behisob».
Ha, otaxon futbolning chin shaydosi edi. U istiqlol yillari ham millionlar o‘yiniga oshufta yashadi. Xususan, «Nasaf»ning shiddatli o‘yinlaridan qalbi quvonchga to‘ldi. Bir yilcha muqaddam «Nasaf» futbolchilari bilan uchrashuvda o‘ta ta’sirli gapirgani esimizda: «Yoshim 80da, «Nasaf»ning bronza va kumush medallari yutganini ko‘rdim, sevimli jamoam O‘zbekiston kubogini 3 marta boshi uzra baland ko‘tardi, OFK kubogida g‘alaba nashidasini surdi. Endi chempionlikni ham birga tantana qilaylik...». «Nasaf» 2021 yili OCHL saralashi «pley-off» bosqichida BAAning Abu-Dabisida «Bani Yas» bilan kuch sinashadigan bo‘ldi. Xorij safariga otlangan otaxonning o‘y-xayoli faqat bo‘lajak o‘yinda edi: «Nima bo‘lsa ham, «Nasaf» g‘alaba qozonsin. Jamoamiz yutug‘i kuchimga kuch qo‘shadi. Bu tani sihatligimning asosi ham». Abu-Dabi shahridagi muhtasham stadion. «Nasaf» sharfini bo‘yniga tashlab olgan otaxon alohida ajralib turardi. «Ajdarlar» ketma-ket 2ta gol urishgach, uning nechog‘li shodlanganini ko‘rsangiz edi. «Yaratganga shukr, vatanga g‘alaba va yorug‘ yuz bilan qaytadigan bo‘ldik», -deya barchani alqagani ko‘z oldimdan sira ketmaydi.
Chori Aslanov futbol bilan kundalik mashg‘ulotlarni birga olib bordi. Dars soatlarida fanga doir bilimlarini zamon shiddati bilan uyg‘unlashtirdi. Xususan, bir qator ilmiy risola va qo‘llanmalar, darsliklar yaratdi. Mashg‘ulotdan so‘ng esa lirik chekinish bilan talabalarni sog‘lom turmush tarziga targ‘ib etdi. Mashhur sharhlovchi Axbor Imomxo‘jayevning hayot tajribasini misol keltirib, halollik, poklik, sog‘lom turmush tarzi uzoq umr garovi ekanligini bot-bot takrorladi. Nabiralari - Bobur va Azamatga o‘z sohasi bo‘yicha tushuncha berish asnosida ularni stadion tomon yetakladi, kenjatoy Muhammadni munosib davomchisi sifatida erkalatdi. «Nasaf» fan-klubi yetakchilari O‘ktam Uzoqov va Sanjar Sayfiyev bilan Superliga o‘yinlari bahona mamlakatimiz shaharlarini kezdi. Stadiondagi hayqiriqlarda Chori otaning ovozi o‘zgacha jarangladi.
O‘lim haq. 15 iyun kuni kuni Chori ota Aslanov bu foniy dunyoni tark etdi. Undan shirin xotiralar qoldi, odamgarchilik, halollik, mehr-muhabbat, do‘stlik kabi tushunchalarning vatan tuyg‘usi bilan mushtarakligi qoldi. Shunday ulug‘ insonlar merosi bor ekan, hayotimiz, shu jumladan, futbolimiz ham yangi marralar sari yuz tutaveradi.
Husan TEMIROV
