Bir necha haftadan beri "MYU" va uning yangi darvozabon qidirayotgani haqida mish-mishlar yurgan edi. Mana hozir hammasi ayon bo‘ldiki, "Inter" bilan Andre Onana borasida kelishuvga yaqin kelingan. Jamoaga 12 yil davomida xizmat qilgan David De Xea ayni damda "qizil iblislar" safini tark etib ulgurdi. Uning o‘rni Onanaga topshirilishi aytilgan. Kamerunlik posbon "Inter"da atigi bir mavsum o‘ynadi. Ammo yana ko‘chishni amalga oshiradigan ko‘rinadi. Xo‘sh, "Manchester Yunayted" nega aynan Andre Onanani istamoqda?
Onana "MYU"ga nima beradi?
Erik ten Xagning Onanaga qiziqayotganligining asosiy sababi bu futbolchining yuqori darajadagi texnikasidir. U oyoq bilan yaxshi o‘ynay oladi. Bu esa ten Xag jamoasiga o‘ta kerakli bo‘lgan xususiyatlardan biridir. Masalan, aniq uzatmalar bo‘yicha Onana De Xeadan 10.2 foiz ustunlikka ega. Qolaversa, Erik ten Xag "MYU"da to‘p egaligiga asoslangan jamoa qurmoqda. Onananing kelishi esa raqib bosimiga chidamlilikni oshiradi. Negaki, Onana raqib pressingi paytida to‘pni maydon markazi, hatto hujumga ham aniq tarzda yetkazib bera oladi. Kamerun terma jamoasi a’zosi "Ayaks" va "Inter" safida jami 104 ta quruq o‘yin o‘tkazgan. Bu o‘rtacha har 2.5 ta o‘yinda bitta dahlsiz darvoza degani. Onananing seyv ko‘rsatkichi 76.4 foizga teng. Faoliyatida 255 ta o‘yinda maydonga tushganini hisobga oladigan bo‘lsak, bu ajoyib natija hisoblanadi.
Andre Onananing "MYU" o‘tish tafsilotlari
"Manchester Yunayted"ning darvozabon uchun taklif etgan 38.5 million funtlik qiymati rad etilgandi. Shundan keyin ma’lum bo‘ldiki, "Inter" talabi va taklif o‘rtasida anchagina katta farq mavjud. Milanliklar 27 yoshli futbolchi evaziga kamida 50 million so‘ramoqda. Masalan, "MYU" ham 38.5 milliondan tashqari 4.3 million bonuslar ham berilishini aytgan. Ammo "Inter" baribir ko‘nmagan. Shunday ekan, 50 million funtga yaqin taklifsiz hech narsa o‘zgarmaydi. Darvozabonning o‘zi APLga ko‘chishga tayyor ekanini bildirgan. Onanaga "Chelsi" ham qiziqmoqda. Ammo katta ehtimol bilan vaziyat "MYU" foydasiga hal bo‘ladi.
Andre Onana natijalari
Klub: "Ayaks"
O‘yinlar: 214 ta
O‘tkazilgan gollar: 192 ta
Quruq o‘yinlar: 85 ta
Klub: "Inter"
O‘yinlar: 41 ta
O‘tkazilgan gollar: 36 ta
Quruq o‘yinlar: 19 ta.
Jami: 255 ta o‘yin, 226 ta o‘tkazilgan gol, 104 ta quruq bahs.
ISMATOV J.