Braziliyaning «Korintians» klubi muxlislari futbolchilardan birini ayovsiz kaltaklashdi.

Globo nashrida keltirilishicha, ultras endi undan klub bilan tuzgan shartnomasini zudlik bilan buzib, tezroq ketishni talab qilmoqda. Savol: o‘sha futbolchi qaysi aybi tufayli kuchli nafratga uradi? O‘zi u kim?

Hammasi tushunarli: ta’kidlanishicha, yarim himoyachi Luan «Korintians» uchun murakkab bir pallada o‘zini jarohatlangandek ko‘rsatgan (qovurg‘asi shikastlanganini aytib, mash­g‘ulotlarda qatnashmagan). Eng yomoni, muxlislar uning jarohati soxta ekanligi va do‘stlari bilan ko‘ngilxushlik qilishga yo‘l olganidan xabar topishgan. Qisqasi, ular Luan dam olayotgan joyga bostirib kirib, uni ziyofatga chaqirilgan 4 nafar ayol ko‘z o‘ngida kaltaklashgan. Endi muxlislar futbolchini qo‘rqoqlik va nomardlikda ayblashmoqda va ushbu xatti-harakatini aslo kechirmoqchi emaslar. Deylik, ultras futbolchiga ham, klub rahbariya­tiga ham o‘rtadagi shartnomani bekor qilish masalasida bosim o‘tkazmoqda.

Aslida «Korintians»ning joriy mavsumdagi omadsizligida 30 yoshli Luanni ortiqcha ayblash noo‘rin. Chunki u maydonga tushmayapti. Shuning barobarida futbolchining transferi klubga ancha qimmatga tushganini aytish kerak. Har holda, «Korintians» 3 yil oldin Luanni o‘z safiga qo‘shib olish yo‘lida 5 million yevro sarflagandi (klub tarixidagi rekord summa). Biroq eng qimmatbaho futbolchi endi naf keltirolmaydi, chog‘i. Eng qizig‘i, braziliyalik muxlislar Luanni Eden Azarga o‘xshatishmoqda. Nega? Ha, belgiyalik futbolchi «Real»da ko‘p jarohatlandi, ammo u biror marta ayyorlik ishlatmagandir. Ayniqsa, qandaydir ko‘ngilxushlik uchun. Alohida ta’kidlash joiz, «Korintians»ning turnir jadvalidagi pozisiyasi mojaroni yanada keskinlashtirmoqda. Binobarin, Braziliyaning azaliy grandi ayni payt 20ta ishtirokchi orasida 16-o‘rinni band etib turibdi va unda «A» seriyadan quyi divizionga qulash xavfi yo‘q emas.