«Milan»ning yangi a’zosi - «Chelsi»dan turli bonuslarni qo‘shib hisoblaganda, 20 million yevro evaziga sotib olingan Ruben Loftus-CHik transfer rasmiylashtirilganidan so‘ng Milan TV mehmoni bo‘ldi
27 yoshli markaziy yarim himoyachi yangi klub futbolchisi sifatida bergan birinchi intervyusida «rossonerlar» safiga qo‘shilishiga aynan kim turtki berganini oshkor qildi. Ruben shuningdek, bolalikda qaysi yulduzga havas qilganiyu, universallik xususiyatini qanday o‘zlashtirgani haqida gapirdi.
- Ruben, «Milan»ga xush kelibsan. Aytchi, bu klub haqida aynan nimalarni bilarding?
- Albatta, hozir g‘ayrioddiy tuyg‘u ichidaman. Zero, 20 yil davomida «Chelsi» bilan birga bo‘ldim - bu o‘zim uchun alohida tarix. Taqdir ekan, jonajon klubimdan ketishimga to‘g‘ri keldi. Hayotda yangi bobni «Milan»dek jamoada boshlash hammaga ham nasib etavermaydi. «San Siro»da o‘ynash imkoniyati, katta tarixga ega buyuk klub libosini kiyish... Bunga birdan ishonish qiyin. «Milan» afsonalarini eslashning o‘zi har kimni to‘lqinlantirib yuboradi. Qisqasi, «Milan» formasini qo‘lga olish va kiyish men uchun ham sharaf hisoblanadi. Do‘stim Fikayo Tomorining klub safiga oldinroq qo‘shilganini hisobga olsak, xursandchiligim ikki hissa baland...
- Demak, Milanga seni Tomori chorladi, shundaymi?
- O‘ylaymanki, Tomorining faoliyati Angliyadan tashqarida yangi chorlovni qabul qilgan futbolchi uchun ajoyib namuna hisoblanadi. Har holda, u bu yerda o‘sishga erishdi, katta muvaffaqiyat sari qadam tashladi. Qisqasi, Fikayoning «Milan» bilan qayd etgan g‘alabalari va umumiy taraqqiyoti meni o‘zgacha ilhomlantirdi, shu asnoda jamoa taklifiga ijobiy javob berdim. Binobarin, Tomori bilan akademiya jamoalaridayoq birga o‘ynaganmiz. Endi «San Siro»da ham bir xil libosda maydonga tushishimiz juda yoqimli. Yashirmayman, oxirgi 1, hattoki 2 oy davomida u bilan juda ko‘p gaplashdim. Ayniqsa, OAVda muzokara jarayoni boshlangani haqida xabarlar chiqqanidan keyin Tomorining o‘zi tez-tez aloqaga chiqib, yana klubdosh bo‘lishimiz imkoniyati qandayligi bilan qiziqib turdi. To‘g‘ri, ma’lum vaqtgacha undan to‘liq va batafsil ma’lumot olishdan tiyildim. Ishlar nisbatan jiddiylashgach esa, Fikayodan klub haqida so‘rayverib, joniga ham tegdim, shekilli. Aniqroq aytganda, «Milan»ning kundalik hayoti haqida hammasini bilishni istadim - o‘zi qayerda yashaydi, qolgan futbolchilar-chi, mashg‘ulotlar bazasi qanday va hokazo... Do‘stim esa barcha savollarimga lo‘nda javob berdi: «Agar kelsang, klub naqadar kattaligini ko‘rasan, uning tarixi va libosida o‘ynash nimani anglatishini tushunasan». Shundan keyin «Milan»ga o‘tish vasvasasiga tushib qoldim ochig‘i...
- O‘tgan mavsum o‘yinlarini nazarda tutsak, «San Siro» muhitini allaqachon his qilgansan...
- Ha, Chempionlar Ligasida «Milan»ga qarshi o‘ynash asnosida «San Siro» haybati bilan tanishdim, qaynoq muhit jamoaga nechog‘li ta’sir qilishini ma’lum darajada tushundim. To‘g‘risi, garchi «Milan» raqibi sifatida maydonga tushgan bo‘lsakda, stadionda yuzaga kelgan manzaradan o‘zgacha rohatlandik - hammasi ajoyib! Yoshligimda Kakaning «Milan» libosidagi o‘yinlari tomoshasiga oshufta edim, uni tom ma’noda yaxshi ko‘rardim. Ayniqsa, to‘p bilan muomalasini aqlimga sig‘dirolmasdim. O‘ylaymanki, maydonda eng kuchli tomonlarimdan biri - bu to‘pni olib qo‘yish va raqibdan qochish. Ochiq aytaman, bu xususiyatning shakllanishida Kaka o‘yiniga muxlislik qilganim ta’siri katta. Zero, u o‘yinning ushbu elementlariga ega eng kuchli ijrochilardan biri edi o‘z vaqtida.
- Endi jahonning eng yaxshi vingerlaridan biri hisoblangan Rafael Leauga qarshi emas, balki u bilan birga o‘ynaysan. Bu qanday bo‘larkin...?
- O‘tgan mavsum doirasidagi o‘zaro o‘yinlar yakunida Leau bilan qo‘l berib ko‘rishdik. Ayni payt u mutlaq boshqa darajada, global yulduzga aylanib ulgurdi. Rafael hali faqat va faqat yanada kuchayishi mumkin. Birinchidan, nisbatan yosh, ikkinchidan, o‘sish uchun barcha zarur xususiyatlari bor. Aytgancha, Rafa ham bir necha hafta burun menga xabar yuborib, yoniga chorladi. Shunday ekan, muammo yo‘q, o‘ylaymanki, maydonda o‘zaro hamkorligimiz juda yaxshi chiqadi.
- O‘zi aynan qaysi pozisiyada o‘ynashni ma’qul ko‘rasan? Aniqroq so‘raganda, qayerda o‘zingni suvdagi baliqdek his qilishing mumkin?
- Shu kunga qadar turli pozisiyalarda o‘ynab ko‘rdim, barchasida harakatlanish bobida ozmi-ko‘p ko‘nikmaga egaman. «Chelsi»ning hamisha turli sxemalarga tayangani universal bo‘lishni taqozo etardi. Turli pozisiyalarda to‘p surish o‘zimga ham yoqadi. Savolga lo‘nda javob berishim kerak bo‘lsa, yarim himoyada, box-to-box pozisiyasida erkinroq harakatlansam kerak. Chunki oldinga intilish va gol urishni yoqtiraman. Menimcha, jismoniy imkoniyatim vaqtida ortga qaytib, himoya ishlariga ulgurishimga imkon beradi. Qisqasi, fikrimcha, box-to-box rolida ko‘proq naf keltirishim, o‘yinga kuchliroq ta’sir o‘tkazishim mumkin. Sir emas, APLda bosim katta, o‘yinlar jismoniy kuch va mehnat talab qiladi. Ko‘rganlarim va bilganlarim asosida aytsam, «A» seriyada boshqacha - taktika birinchi o‘rinda. Italiya chempionati xuddi shaxmat taxtasiga o‘xshaydi. Demak, taktik bilimni oshirishim, barchasini o‘yin ichida his qilishim kerak. Yaxshiki, taktikaga urg‘u qaratadigan italiyalik murabbiylar qo‘l ostida ishlaganman va bu borada muayyan tajribam yo‘q emas.
- Ruben Loftus-CHik odatiy hayotda qanday yigit?
- Tabiatan ancha xotirjam va qiziquvchan insonman. Futboldan tashqarida, do‘stlar bilan hordiq chiqarishni xush ko‘raman, bo‘sh vaqtda ko‘proq tennis bilan shug‘ullanaman - bu men uchun futboldan keyinda turuvchi sport turi. Qaysidir masalada tashabbus ko‘rsatish talab etilsa, barchasini qo‘lga olishim mumkin. Lekin asliyat o‘zgarmaydi - futbolni boshqacha yaxshi ko‘raman, asosiysi shu.
- «Milan» muxlislariga nimadir deyishni xohlasang, marhamat...
- Avvalo, hammaga salom. Muxlislarga yana bir bora takrorlayman: bu klub safiga qo‘shilish men uchun sharafdir. Hozir «Milan» libosini kiyish va ko‘z oldingizda o‘ynash onlarini sabrsizlik bilan kutyapman. Iliq qabul va qo‘llab-quvvatlov uchun tashakkur, barchangiz bilan ko‘rishishga ilhaqman.
Ruben Loftus-CHik keyinchalik «Chelsi»dan nega ketgani xususida alohida to‘xtaldi: «Albatta, jonajon klubimni hamon yaxshi ko‘raman. Ammo «Stemford Brij»da yetarli amaliyot va imkoniyatga ega bo‘lmadim. Aslida ko‘proq imkoniyatga munosib edim, ammo buni menga ravo ko‘rishmadi. Vaholanki, menda jismoniy tomondan qandaydir muammo sezilmayotgan va maydonga tushganimda o‘z darajamni namoyish etayotgandim. Qisqasi, shu munosabat o‘laroq, ketish vaqti yetganini tushundim...».
MUHAMMADXON tayyorladi
