Butun OAVda bong urilganidek, «Pari Sen-Jermen» klubi yangi keng qamrovli loyihaga qo‘l urdi: jamoani yangilash, yoshartirishni boshlab yubordi...
Shuningdek, uni boshqarishga juda to‘g‘ri mutaxassis tanlandi. Jamoaning ispaniyalik yangi murabbiyi - Luis Enrike Parijga kelganidan beri ommaviy axborot vositalariga o‘zining birinchi intervyusini berdi. Unda mutaxassis yangi sarguzashtidagi motivasiyasi va futboldagi yo‘li haqida gapirdi.
- Luis, yangi oilangizga xush kelibsiz. Bu faoliyatingizdagi yangi bob, hozir nimani his qilyapsiz?
- Men juda xursandman, faxrlanaman va ishga kirishish istagida yonmoqdaman. Hammasi yangi va bunday vaziyatda xuddiki komfort zonadan chiqqaningizga o‘xshaydi. Lekin menda motivasiya bor, chunki bu yangi mamlakat, yangi shahar, yangi o‘yinchilar, yangi odamlar, yangi jamoa... Lekin barchasi juda ijobiy va aytganimdek, haqiqatan ham ishga kirishishni intiqlik bilan kutyapman.
- «PSJ» loyihasi nimasi bilan sizni o‘ziga jalb qildi?
- Asosiy sabab shundaki, rahbarlar qurmoqchi bo‘lgan jamoa, «PSJ»da mavjud resurslardan foydalangan holda qurmoqchi bo‘lgan loyiha haqida juda aniq tasavvurga ega. Va men nafaqat iqtisodiy resurslar haqida, balki infratuzilma nuqtai nazaridan resurslar haqida ham o‘ylayman. Bu yerdan, menimcha, bu loyiha mening darajamdagi murabbiyga kerak bo‘lgan hamma narsani birlashtiradi.
- Siz qanday murabbiysiz? Jamoaga nima bermoqchisiz?
- O‘ylaymanki, mening jamoalarim o‘yinini ko‘rganlar g‘oyalarim haqida biroz bo‘lsada bilishadi. Men aniq hujumkor murabbiyman. Mening tarkibim bilan bizga birinchi daqiqadan boshlab o‘ynaydigan, hisoblamaydigan yoki hujum qilmaydigan jamoa kerak. Biz o‘yinchilar «PSJ»ni taqdim etishdan zavqlanishlarini va muxlislarni xursand qilishlarini istaymiz.
- «PSJ» tarkibida buyuk o‘yinchilarning mavjudligi siz uchun motivasiya manbai bo‘lganmi?
- «PSJ»ning barcha o‘yinchilari buyukdir: akademiyadan kelgan yoshlar - bizda barchasi allaqachon yulduzlardir. Ammo jamoani qurish uchun bularning barchasi va unga ishonadigan murabbiyning kombinasiyasi kerak. Va bu holda, biz muvaffaqiyatga erishishimizga to‘liq aminman.
- Siz «PSJ» kampusini ochgan murabbiymisiz, bu haqiqatan ham ish uchun ideal vositami?
- Qanday baxt! Men hech narsa qilmasdan kelaman va bu kampusdan birinchi bo‘lib foydalanaman, hatto bu yerda tunab qolgan birinchi odamman. Yana takrorlayman, qanday baxt, men buni juda qadrlayman. Hujumkor futbol o‘ynashni yaxshi ko‘radigan murabbiylarga yuqori darajadagi maydonlar va inshootlar kerak va bu yerda juda yaxshi. Dunyodagi kam sonli klublar bunday imkoniyatlarga ega va menimcha, ular «PSJ» darajasiga mos keladi. Qanday bo‘lmasin, aytganimdek, ulardan birinchi bo‘lib foydalana olganimdan juda xursandman.
- «PSJ» kiyinish xonasida turli millat vakillari ko‘p. Buni qanday tushunasiz?
- Bugungi kunda dunyodagi barcha bunday salohiyatga ega yirik klublarning kiyinish xonalarida, kamida besh-olti xil millat vakillari bor. Ko‘pincha siz uch yoki to‘rt tilda gaplashishingiz kerak. Turli tillarda muloqot qilish zamonaviy futbol talabi, bu normal holat. Men buni imkoniyat sifatida qabul qilaman. Fransuz tilini tezda o‘rganishni istayman, lekin hozir ba’zi o‘yinchilar bilan italyan tilida gaplasha olaman, boshqalar bilan ingliz tilida gaplashaman va ispan tili... Menimcha, har bir kishi o‘ziga eng mos keladigan tilda muloqot qilishi juda muhimdir. Ammo Fransiya va Parijga kelgan barcha chet elliklar mahalliy tilni o‘rganishlari ham juda muhimdir.
- Sizning boshqaruvingizdagi «PSJ»dan nimani kutishimiz mumkin? Oldingizda qanday maqsadlar bor?
- Mening maqsadim - klub muxlislari o‘z jamoalari bilan, maydonda ko‘rganlari bilan faxrlanishlari va tomoshadan zavqlanishlaridir. Va agar ular tirishqoqlikni, ishni, yaxshi hujum qiladigan va o‘zini yaxshi himoya qiladigan birdam jamoani, jipslangan guruhni ko‘rsalar, qadrlashadi, albatta. Agar bu ularga yoqsa - bunga esa aminman, ular o‘z jamoalari bilan faxrlanishadi.
- Siz «Park de Prens»ni biroz bilasiz, lekin endi uni «PSJ» murabbiyi sifatida yaxshi bilib olasiz. U yerda ishlashdan oldin o‘zingizni qanday his qilyapsiz?
- Bu haqiqatan ham ajoyib stadion va men uni juda yaxshi bilaman, u yerda ham o‘yinchi, ham murabbiy sifatida ko‘p azob chekkanman. Bu mehmon jamoalar uchun juda og‘ir vaznli stadion va umid qilamanki, ularga yanada qiyin bo‘ladi. Jamoa a’zolari o‘rtasida birdamlik qanchalik mustahkam bo‘lsa, muxlislarimiz bilan ham shunchalik yaqinlik bo‘ladi va bu orqali jamoamiz faqat yutadi. O‘tgan mavsumda jamoa uyda juda ko‘p ochko yo‘qotdi. O‘z uyimizda yengilmas bo‘lishimiz kerak va buning uchun muxlislarimiz muhabbati zarur. Ammo biror narsa so‘rashdan oldin, siz ularga kutganlarini bera olishingiz kerak. Biz muxlislarni qo‘llab-quvvatlashlariga va futbolimizdan zavqlanishlariga majbur qilishimiz kerak.
- Va ular uchun xabaringiz bormi?
- Bilingki, men sizni g‘ururlanishingizni xohlayman, sizga jamoangiz ishlayotgani, kurashayotgani, yaxshi futbol o‘ynayotgani va eng muhimi, har bir o‘yinni hisob-kitob qilmasdan ochko uchun o‘ynayotganini his qilishingizni istayman. Buni men sizga murabbiy sifatida kafolat bera olaman. Bu ish beradimi yoki yo‘qligini bilmayman, lekin natijalarni bashorat qila olmasam ham, buni amalga oshirish mumkinligiga aminman. Umid qilamanki, siz juda zavqlanasiz.
MUHAMMADXON tayyorladi
