Avvalroq biz faoliyatini yakunlaganidan keyin bankrotga uchragan futbolchilar haqida mulohaza yuritgandik.
Navbatdagi hikoyamiz esa aksincha, yashil maydonni tark etgach, o‘zlariga munosib yumush topib, futboldagidan mo‘mayroq daromadga ega bo‘layotgan ishbilarmonlarga bag‘ishlangan.
Robbi FAULER
«Liverpul»ning ko‘pchilik muxlislariga «Ma’bud» taxallusi bilan tanish bo‘lgan Robbi faoliyati davomida muvaffaqiyatli to‘p surdi, so‘nggi bosqichdagi jarohatlari bo‘lmaganida, yanada ko‘proq mablag‘ to‘plashi mumkin edi. Biroq nafaqaga chiqqanidan keyin, u yanada badavlat bo‘lib ketdi. Bunga Fauler murabbiylik faoliyati bilan emas, balki biznesga, ko‘chmas mulk va o‘zi tashkil etgan kompaniyalar tufayli erishdi. Dastavval Robbi Stiv Makmanaman bilan hamkorlikda kompaniyaga asos solgandi. Keyin o‘zining xususiy korxonasini ochdi. Shu tariqa sobiq futbolchining aylanma kapitali 2017 yilda 30 mln. funt sterlingdan oshib ketdi.
Tomas GRAVESEN
Li Karsli bilan «Everton»ning omadsiz yarim himoyachilar duetini tashkil etgan daniyalik futbolchi 2005 yilda «Real»ga o‘tish orqali mashhur bo‘lgandi. To‘g‘ri, u bir yildan keyin Madridni tark etdi. Lekin 2009 yilda Tomas nafaqaga chiqib, faoliyatini tubdan o‘zgartirdi. Ya’ni, u Las-Vegasga yo‘l olib, pokerdagi va muvaffaqiyatli sarmoyalari evaziga san’at va sport yulduzlari orasida 10 yilcha shohona hayot kechirdi va Daniyaga qaytdi.
Dekster BLEKSTOK
2017 yilda butsalarini mixga ilgan 30 yoshli futbolchi KPR (2006-2009) va «Nottingem Forest» (2016 yilgacha) jamoalarida risoladagidek to‘p surib, shunga yarasha pul ishladi. Lekin nafaqaga chiqqanidan keyin farmasevtika sohasida serdaromad biznesni yo‘lga qo‘ydi. U Medi Connect firmasining bosh direktori va UK Meds onlayn-dorixonasining aksioneri hisoblanadi. Shuningdek, Dekster ko‘chmas mulk sohasida ham o‘z omadini sinab ko‘rdi. Lekin 2019 yil oktyabrida lisenziyaga oid hujjatlarida qonunbuzarlikka yo‘l qo‘ygani aniqlanib, 24000 funt-sterlingga jarimaga tortildi.
Maykl OUEN
Ko‘pchilikka dunyodagi eng zerikarli shaxs sifatida tanilgan afsona duch kelan sohaning reklamasida suratga tushaveradigan xushomadgo‘y inson edi. Uning harakatchanligi o‘z samarasini berdi. Ot poygasining ishqibozi bo‘lgan Mayklning bir nechta chopag‘on otlari bor, ular bilan 2011 yilda Royal Ascot poygasida va 2015 yilda Dubaydagi jahon Kubogi turnirida zafar quchgan. Bundan tashqari, Ouen mamlakatda yuksak nufuzga sazovor bo‘lgan Manor House otxonasining egasi. OAV va ekspert maqomidagi faoliyatida zerikarli shaxs maqomini olgan afsona shu tariqa millionlar sohibiga aylandi.
Matyo FLAMINI
Nahotki «Arsenal» (2 marta) va «Milan»da jamg‘argan boyligi kamlik qilgan bo‘lsa? 2019 yilda nafaqaga chiqqanidan keyin atrof-muhitni muhofaza qilish sohasida ish boshlagan Flamini ulkan muvaffaqiyatlarga erishmoqda. O‘tgan yildagi ma’lumotlarga ko‘ra, uning boyligi 11,6 mlrd. funt sterlingga yetgan. Flamini o‘z kompaniyasidan tashqari, bioolam masalalarini yoritishga ixtisoslashgan nufuzli jurnalining asoschilaridan biri hisoblanadi. Qo‘shimchasiga, u nafaqat saviyali futbolchi, balki ajoyib inson. U 2024 yilda bo‘ladigan Parij Olimpiadasida atrof-muhitni muhofaza qilish qo‘mitasining a’zosi sifatida ishtirok etadi.
Sun JIXAY
Mazkur xitoylik afsona APLda gol urishga muvaffaq bo‘lgan sharqiy osiyolik dastlabki futbolchidir. «Manchester Siti»da to‘p surgan futbolchi 2002 yil oktyabrida shu tarixiy golni amalga oshirgandi. Angliyada Sunni ko‘pchilik unutgan bo‘lishi mumkin, lekin Sharqiy Osiyoda u yuksak nufuzga ega. 2002 yilda terma jamoasi bilan JCHda maydonga tushgan. Keyin 2016 yilda sport sohasi bilan shug‘ullanadigan kompaniyaga asos soldi. Qisqa vaqt ichida undagi xizmatchilar soni 100tadan oshib ketdi. Hozirda kompaniya ijtimoiy tarmoqlarda 400 mln.dan ortiq obunachiga ega, Sun Jixay esa o‘ta aqlli va badavlat millioner.
Ramon VEGA
Qizig‘i shundaki, shveysariyalik himoyachi shimoliy Londondagi muxlislarga «Tottenxem»ning oxirgi chempionligi va 1999 yildagi Liga Kubogi orqali tanish. Faoliyatining qolgan davrini Vega faqat o‘rinbosarlar jamoasida o‘tkazgan. Biroq bu Ramonni ortiqcha qiziqtirmaydi. Chunki u 2006 yilda o‘z yurtida ko‘chmas mulk bilan shug‘ullanadigan kompaniyani tashkil etdi, 2012 yilda xususiy kapital va kirim-chiqimlarni boshqaradigan moliyaviy guruh asoschilaridan biriga aylandi. Afsuski, «Breksit» voqeasi tufayli sobiq futbolchining muassasalaridan biri yopildi. Lekin boshqa sohalardagi ishlari chakki emas: 2009 yilda u «Portsmut»ni sotib olishga tayyor ekanligini e’lon qilgani uning milliardlarga qodir ekanligini isbotlaydi.
Lui SAA
«MYU», «Everton» va «Fulxem» klublarining sobiq hujumchisi o‘z davrida sermahsul o‘yinchilarning biri edi. Lekin jarohatlar tufayli o‘z salohiyatini to‘liq yuzaga chiqara olmadi va 2013 yilda butsalarini mixga ilishga majbur bo‘lgandi. Nafaqaga chiqqanidan keyin Lui o‘ziga o‘xshagan sobiq sportchilarga ko‘mak beradigan Aix Stars kompaniyasini tashkil etdi. Muassasa o‘z mijozlariga ixtisos tanlashda tavsiyalar berishdan tortib, moliyaviy yordam ko‘rsatishni ham o‘z zimmasiga olgan. Lui Saa shuningdek, 2012 yilda chop etilgan dastlabki asari - «Quti ichidagilarni o‘ylab?» kitobining muallifidir.
Sodiq Sobir tayyorladi
