O‘zbekiston kubogi 1/8 finalidan o‘rin olgan  “Aral” – “Navbahor” (0:2)  jamoalari uchrashuvidan keyingi matbuot anjumanining  ikkinchi qismida mezbonlar  bosh murabbiyi Ne’matilla Qutiboyev qatnashib, jurnalistlarning  savollariga javob berdi.

Odatdagidek, nukusliklar ustozi  o‘z so‘zini o‘yin haqidagi fikrlari bilan boshladi.

— Bugun Superliga yetakchilaridan biriga qarshi bahs o‘tkazdik. Birinchi bo‘limda teng o‘yin bo‘ldi, ikkinchi bo‘limda esa “Navbahor” o‘z darajasini ko‘rsatdi. Ikkinchi 45 daqiqalikda namanganliklar mahorat bobida va jismoniy jihatdan kuchli ekanliklarini namoyish etishdi.     
— “Aral” bugun yaxshi o‘yin ko‘rsatdi, lekin zaxiradagilardan kam foydalandingiz...
— Foydalanishga harakat qildik, biroq majburiy o‘zgarishlar yuz berganidan so‘ng, rejalarimiz o‘zgardi. Himoyachilarda jarohat bo‘lgani bizga muammo tug‘dirdi.

— “Aral”ning joriy mavsumdagi maqsadi qanday?
— Jamoamizning asosiy maqsadi — maydonda chiroyli o‘yin ko‘rsatib, muxlislarni xursand qilish. Natija esa o‘z-o‘zidan kelaveradi.

— Muxlislar bugun har doimgidanda faol bo‘lishdi. Ularga tilaklaringiz...
— Ishqibozlarimizga rahmat aytaman. Muxlislar jamoamizni buungi o‘yinda munosib tarzda qo‘llab-quvvatlab turishdi. Ishqibozlar doimo bizga dalda berib turishadi. Bugungi mag‘lubiyat uchun muxlislardan kechirim so‘rayman.

— Bugungi raqibingiz “Navbahor” haqida qanday  fikrdasiz?
— “Navbahor”da chempionlik uchun kurasha oladigan futbolchilar yig‘ilgan va jamoa zo‘r tarkibga ega.

“Navbahor” PFK matbuot xizmati.