Niderlandiya erkaklar milliy jamoasi boshqaruvini ayol murabbiy qo‘lga olishi mumkin.

Boz ustiga, juda yaqin orada. Har holda, TeleSport xabariga qaraganda, mamlakat futboli rahbariyati «lolaranglar» bosh murabbiyi lavozimiga nomzodlar short-varaqasiga Angliya ayollar termasi ustozi Sarina Vigman xonimni ham kiritdi.

Avvalo, qisqacha ma’lumot: Vigman - vaqtida markaziy yarim himoya va orqa chiziqda to‘p surgan niderlandiyalik sobiq futbolchi. Oldinroq The Telegraph nashrida shu mazmunda xabar chiqqandi: «Niderlandiya milliy jamoa­si bosh murabbiyi Ronald Kuman iste’foga chiqarilgan taqdirda mamlakat Qirollik futbol ittifoqi Sarinani uning o‘rnini egallashga nomzod mutaxassislar qatoriga qo‘shmoqchi». Agar Kuman chindan ham, iste’fo bersa va Sarina xonim nomzodi tanlansa, u futbol tarixida erkaklar milliy jamoasini boshqaradigan birinchi ayol bo‘ladi.

Sarina Vigman hozircha Ang­liya ayollar termasidagi ishini davom ettirmoqda. Inglizlar yaqinda uning boshqaruvida ayollar o‘rtasidagi JCH-2023 finaliga chiqishdi va hal qiluvchi bahsda ispanlarga imkoniyatni boy berishdi - 0:1. Alohida e’tirof etish o‘rinli, bu Angliya ayollar termasi uchun mundialdagi eng yuqori natijadir. Qolaversa, Vigman jamoasi 2021 yili Yevropa chempionatida g‘olib chiqqandi.

Fakt
Sarina Vigman Angliya­ga yo‘l olshiga qadar Niderlandiya ayollar termasi bilan ham Yevropa chempionati g‘olibiga aylangan va JCHda kumush medal yutgandi.