"Al-Hilol" jamoasi Saudiya Pro ligasi doirasida "Damak" klubiga qarshi 1:1 hisobida durang o‘ynagach, bosh murabbiy Jorje Jezushni iste’foga chiqarish masalasi yana kun tartibiga qaytdi.
Hozirda klub rahbariyati Jezush o‘rniga yordamchi murabbiy sifatida ishlab kelayotgan Muhammad ash Shalhub nomzodini ko‘rib chiqmoqda. Neymar esa Braziliya terma jamoasi sobiq bosh murabbiyi Tite variantini taklif qilgan. Jezush iste’foga chiqarilgan taqdirda, "Al-Hilol" portugaliyalik murabbiyga 8 mln. yevro tovon puli to‘lab berishi zarur.
Hozirda Jezushning ishdan ketishini "Al-Hilol" muxlislaridan ham ko‘ra Braziliyaning "Flamengo" klubi muxlislari ko‘proq kutishmoqda. Jezush "Flamengo" bilan 2019-2020 yillar davomida Braziliya chempionati va superkubogini, "Libertadores" kubogi va Janubiy Amerika superkubogini yutish bilan birga, Klublar o‘rtasidagi Jahon chempionati finalida "Liverpul"ga yutqazgan.
