Rossiyaning "Football24.ru" saytida Eldor Shomurodovning Italiyadagi faoliyatiga atalgan maqola e’lon qilindi.

Unda "Kalyari" jamoasining A Seriyadagi muvaffaqiyatsizliklari va Eldorning jamoadan "tushib qolgani" haqida yozilgan.

Shuningdek, maqolada Eldorning keyingi faoliyati qanday bo‘lishi haqida 5 ta variant ilgari surilgan.

1-variant. O‘yin yaxshilanmasa, tez orada "Kalyari"da murabbiy almashadi. Shundan so‘ng, barchasi boshidan boshlanadi. Eldor aynan o‘sha lahzani kutishi va "Kalyari"dan o‘zini sotib olishlarini so‘rashi kerak.

2-variant. Tez orada "Roma"da murabbiy almashishi kutilmoqda. Eldor shu onda jamoaga qaytib yangi murabbiyga o‘zini ko‘rsatishi yoki "Monsa" va "Lechche"dan biriga ijaraga berishlarini so‘rashi kerak. "Sassuolo", "Fiorentina" kabi klublar allaqachon uni short-listidan chiqarib yuborishgan.

3-variant. RPLga qaytish. U Rossiyaga endi oldingi Shomurodov darajasida emas, ancha Yevropada tajriba oshirgan futbolchi sifatida qaytadi va istalgan klubida o‘ynab keta oladi.

4-variant. Saudiya Arabistoni chempionati. Allaqachon bu yurtdan ham Eldorga chorlovlar bo‘lgan. Ayni damda ushbu mamlakat chempionatida Jahon futboli yulduzlari o‘ynayotganini hisobga olsak, Saudiyaga o‘tish Eldor uchun ofat bo‘lmaydi.

5-variant. Osiyo varianti. U moliyaviy jihatdan ancha yaxshi shakllangan Qatar yoki BAA klublarining biriga o‘tishi mumkin. Shuningdek, o‘zbek futbolchilari uchun Janubiy Koreya chempionati ham alternativ yo‘l hisoblanadi.