Россиянинг "Football24.ru" сайтида Элдор Шомуродовнинг Италиядаги фаолиятига аталган мақола эълон қилинди.

Унда "Кальяри" жамоасининг А Сериядаги муваффақиятсизликлари ва Элдорнинг жамоадан "тушиб қолгани" ҳақида ёзилган.

Шунингдек, мақолада Элдорнинг кейинги фаолияти қандай бўлиши ҳақида 5 та вариант илгари сурилган.

1-вариант. Ўйин яхшиланмаса, тез орада "Каляри"да мураббий алмашади. Шундан сўнг, барчаси бошидан бошланади. Элдор айнан ўша лаҳзани кутиши ва "Кальяри"дан ўзини сотиб олишларини сўраши керак.

2-вариант. Тез орада "Рома"да мураббий алмашиши кутилмоқда. Элдор шу онда жамоага қайтиб янги мураббийга ўзини кўрсатиши ёки "Монца" ва "Лечче"дан бирига ижарага беришларини сўраши керак. "Сассуоло", "Фиорентина" каби клублар аллақачон уни шорт-листидан чиқариб юборишган.

3-вариант. РПЛга қайтиш. У Россияга энди олдинги Шомуродов даражасида эмас, анча Европада тажриба оширган футболчи сифатида қайтади ва исталган клубида ўйнаб кета олади.

4-вариант. Саудия Арабистони чемпионати. Аллақачон бу юртдан ҳам Элдорга чорловлар бўлган. Айни дамда ушбу мамлакат чемпионатида Жаҳон футболи юлдузлари ўйнаётганини ҳисобга олсак, Саудияга ўтиш Элдор учун офат бўлмайди.

5-вариант. Осиё варианти. У молиявий жиҳатдан анча яхши шаклланган Қатар ёки БАА клубларининг бирига ўтиши мумкин. Шунингдек, ўзбек футболчилари учун Жанубий Корея чемпионати ҳам альтернатив йўл ҳисобланади.