Mali va Argentina terma jamoalari o‘zaro to‘qnash kelgan U-17 jahon chempionati uchinchi o‘rin uchun bahsi yakunlandi.
Jamoalar Surakarta (Indoneziya) shahridagi «Manahan» stadionida o‘zaro bahs olib borishdi. Uchrashuvni Fu Ming (Xitoy) boshchiligidagi hakamlar brigadasi boshqarib bordi. Mali jamoasi 3:0 hisobida zafar quchdi.
To‘qqizinchi daqiqada Mali terma jamoasi hujumchisi Ibrohim Diarra hisobni ochdi. Birinchi bo‘lim oxirida hujumchi Mamadu Dumbiya Afrika termasining ustunligini oshirdi. 48-daqiqada Hamdiu Makalu yakuniy hisobni o‘rnatdi - 3:0.
Yarim finalda Mali terma jamoasi Fransiya termasiga 1:2, Argentina esa Germaniyaga imkoniyatni boy bergandi (3:3, penaltilar seriyasida 2:4).
Germaniya va Fransiya o‘rtasidagi final 2 dekabr kuni bo‘lib o‘tadi.
