Мали ва Аргентина терма жамоалари ўзаро тўқнаш келган U-17 жаҳон чемпионати учинчи ўрин учун баҳси якунланди.
Жамоалар Суракарта (Индонезия) шаҳридаги «Манаҳан» стадионида ўзаро баҳс олиб боришди. Учрашувни Фу Минг (Хитой) бошчилигидаги ҳакамлар бригадаси бошқариб борди. Мали жамоаси 3:0 ҳисобида зафар қучди.
Тўққизинчи дақиқада Мали терма жамоаси ҳужумчиси Иброҳим Диарра ҳисобни очди. Биринчи бўлим охирида ҳужумчи Мамаду Думбия Африка термасининг устунлигини оширди. 48-дақиқада Ҳамдиу Макалу якуний ҳисобни ўрнатди - 3:0.
Ярим финалда Мали терма жамоаси Франция термасига 1:2, Аргентина эса Германияга имкониятни бой берганди (3:3, пенальтилар сериясида 2:4).
Германия ва Франция ўртасидаги финал 2 декабрь куни бўлиб ўтади.
